Түркістан қаласында Ұлттық домбыра күніне орай мектеп оқушылары мен студенттер арасында «Нағыз қазақ – домбыра» атты күйшілер сайысы өтті. Жас күйшілер сайысында қаладағы жоғары оқу орындарының студенттері мен саз мектебінен жас дарындар қатысты.
Домбыра – көненің көзі, бабадан қалған асыл мирас. Ол – құнды қазына, ұлттық рух. Домбыраны халқымыз қасиетті, киелі санайды. – Екі ішектің бірін қатты, бірін сәл-пәл кем бұра.
Нағыз қазақ – қазақ емес,
Нағыз қазақ – Домбыра!
Домбыра аспабының қаншалықты қадірлі екенін Қадыр Мырза Әлі екі-ақ ауыз сөзбен осылайша түйіндейді.
Байқау қатысушылары күй тартыста аянып калмады. Өз өнерлерін көрсетіп, күмбірлете күй төккен өнерпаздар халқымыздың асылынан артық қастерлеп үкі таққан, жалғызындай аялап қақ төріне ілген ең қымбат, ең сүйікті музыка аспабының бірі – домбыра арқылы халықтың қуанышы мен қайғы-қасіретін көрсететін күйлерді орындап шықты.
– Бұл байқау өз ұлттық дәстүрімізді көрсету, дәріптеу, қадірлеу, жас жеткіншектерді патриоттық тәрбиеге баулуға арналған іс-шара болып саналады. Домбыраның құдіретін, жас өрендердің күй тарту дағдыларын қалыптастыру мақсатында балаларымызды жинап отырмыз, – деді саз өнері мектебінің ұстазы, оркестр жетекшісі Ерлан Асқарұлы.
Сайыс соңында топ жарған үздіктер анықталып, байқау жеңімпаздарына арнайы дипломдар мен қаржылай сыйлық тапсырылды.
Айта кетейік, Ілияс Жансүгіровтің “Күй”, “Күйші” поэмалары – қазақтың асыл өнері күй мен ұлттық мұрасы домбыраға жырдан қаланған ескерткіш. Бұл қаламгерлерден өзге де қазақ өлеңінің тарихында домбыраны жырға қосқан ақын көп. Әрқайсысы әртүрлі стильде жырласа да, ортақ тақырып, ортақ мұңның бір ұқсас тұсы бар, ол – ұлтының ұлы аспабына деген иісі қазақтың құрметі, сезімі мен ойы.
