Ұлыстың ұлы күні – Наурыз мерекесіне орай Түркістан қаласында «Спорт – денсаулық кепілі» ұранымен бұқаралық жүгіру марафоны өтті. Марафон Түркістан облысы әкімдігі мен облыстық дене шынықтыру және спорт басқармасы және Түркістан қаласы әкімдігінің қолдауымен ұйымдастырылды.
Түркістан облысының әкімі Дархан Сатыбалдының тапсырмасына сәйкес, Наурыз мерекесі өңірімізде 10 күн бойы ұлттық нақышта атап өтілмек. Осы ретте, бүгін 500-ге жуық адамның қатысуымен бұқаралық жүгіруден марафон өтті.
Мерекелік жиынның екінші күнінде өткен бұл марафонға спорт саласының мамандары мен жастары, қала тұрғындары мен кішкентай балалар да қатысты. Көктем мерекесінде тамаша көңіл күйге бөленген жерлестеріміз спортта да жүйрік екендіктерін көрсетіп, достық пен бірліктерін арттырды. 66 жастағы түркістандық ардагер спортшы Марат Божбанбаев мұндай спорттық шаралар адам ағзасына өте пайдалы екендігін тілге тиек етті.
Аса тартысты өткен бұл марафонда ерлер бойынша 35 жасқа дейінгі жастар арасында бас жүлдені Ардашер Захадинов иеленсе, күміс жүлдені Ақниет Абдурасилұлы жеңіп алды. Ал, қола жүлде Ердаулет Абеновке бұйырды. Сондай-ақ, 35 жастан жоғары ерлер арасында Еркін Жадырисов жеңімпаз атанса, Марат Нұрмаханов күміс медальға, Ертай Қамбаров иелік етті.
Қыздар арасында 35 жасқа дейінгі қатысушылар арасында алтын медальді Гулнәр Искакова иеленсе, күміс жүлдегер Ксения Самсоноваға бұйырды. Ал, қола жүлдеге Диана Сейтенова қол жеткізді. Сонымен қатар, 35 жастан жоғары жеңімпаз атанған Малика Есжанова өзінің жылдамдығымен көпшілікті таңғалдырды. Күміс медальді Фариза Мұсаева және қола жүлдені Гүлшара Акимбекова иеленді. Ең қызығы, бұл марафонда бірінші жарыс сызығын кесіп өткен талантты Ақниет Абдирасұлына да құрмет көрсетілді.
Жеңімпаздар мен жүлдегерлерді Түркістан облысы әкімінің орынбасары Бейсен Тәжібаев пен облыстық дене шынықтыру және спорт басқармасы басшысының орынбасары Жазира Муслимова арнайы марапаттап, медальдар және грамоталар табыстады.
Түркістан жұртшылығының арасында жоғары деңгейде ұйымдастырылған бұл жиын ертең ұлттық спорт түрлері ойындарымен жалғаспақ.
