Түркістан облысының 4 жылдығына орай, биыл екінші рет ұйымдастырылған Республикалық «Түркістан дауысы» ән байқауы өз мәресіне жетті. Екі күн бойы еліміздің әр өңірінен келген 17 жас әнші Қазақстан композиторларының әндері мен өзі таңдаған шығарманы вокалды инструменталды ансамбль сүйемелдеуімен орындап шықты. Байқауға ҚР Еңбек сіңірген қайраткері, әнші, композитор Медеу Арынбаев, «Құрмет» орденінің иегері, композитор Бейбіт Оралұлы, ҚР Еңбек сіңірген қайраткері, әнші Маржан Арапбаева, Өзбекстанның халық әртісі Мансур Ташматов, ҚР Еңбек сіңірген қайраткері, әнші Жанар Дұғалова қазылық етті.
Тартысты жыр додасында жеңімпазды анықтау қазылар алқасына да оңайға соқпады. Өйткені әрбірі өз өңірінің үздігі, түрлі байқаулардың қатысушылары. Қазылар алқасының төрағасы Медеу Арынбаев осыны алға тартып, қатысушылар дайындығының жоғары деңгейде екенін, олардың ән таңдауы, дауыс техникасы, сахна шеберліктері мен жауапкершіліктері мықты екендігін атап өтті. Ал танымал композитор Бейбіт Оралұлы: Маған Республикалық байқау ұнады. Қатысушылардың дені ән айтудың нағыз шеберлері деуге болады. Олар тіпті халықаралық байқауларға да тәжірибелері жететін кәсіби музыканттар екендігін дәлелдей түсті, – деді.
Қазылар алқасы шешімімен келесі қатысушылар жеңімпаз деп танылды. Бас жүлде иегері Алматы облысының қатысушысы Алмагүл Батталиева атанса, 1-орынға Дидар Абдухалық (Шымкент қаласы), Бахтияр Ақылбек (Ақтөбе облысы) лайық деп танылды. Ал 2-орынды Толғанай Пазылақын (Алматы қаласы) мен Арқас Айдарбек (Батыс Қазақстан облысы) иемденсе, 3-орын Эльвира Нургужина мен (Нұр-Сұлтан қаласы) мен Асыл Жомартовқа (Маңғыстау облысы) және Ернар Амандыққа (Қызылорда облысы) бұйырды. Ал Назрин Мұса (Қарағанды облысы) мен Жанасыл Елюбаев (Ұлытау облысы) және Айдана Риза (Қостанай облысы) байқау дипломанттары атанды.
Байқау жеңімпаздарына Гран-при кубогынан бөлек, арнайы жүлделер мен дипломдар, бағалы сыйлықтар табысталды.
