Түркістан қаласында “Сіздің жолаушыңыз – бала” акциясы өткізілді.
“Қауіпсіз жол жүрісі апталығы” аясында облыс орталығының полицейлері “Сіздің жолаушыңыз – бала” акциясын өткізді. Аталған шараның басты мақсаты – балаларды автомобиль көлігімен тасымалдау кезінде қажетті құрылғыларды пайдалану керек екені туралы халық арасында түсіндіру жұмыстарын жүргізу, сондай-ақ жол-көлік жарақатының алдын алу, жолын кесу. Іс-шара барысында Түркістан ҚПБ қызметкерлері халық арасында, оның ішінде “Жолаушы” ЖШС-ның 30 және “ТехАвтоПром” ЖШС-ның 14 жүргізушісіне жол қозғалысы ережесін қатаң сақтап, балалардың қауіпсіздігін басты орынға қоюды түсіндірді. Жүргізушілерге ескертпе қағаздарын таратты.
Іс-шараның маңыздылығын жіті түсінген жүргізушілер қауіпсіздік шараларын ұстанатынын жеткізіп, полиция қызметкерлеріне алғысын білдірді. Сонымен қатар полицейлер білім ошақтарына барып, бастауыш сынып пен жоғары сынып оқушыларына “Балалардың жолдағы қауіпсіздігі” бойынша арнайы дәрістер өткізді.
