Биыл «2025 – жыл Жұмысшы мамандық жылы» болып жарияланғаны белгілі. Осыған орай, Түркістан қаласы әкімдігінің Ішкі саясат бөлімінің ұйымдастыруымен алғаш рет «Тәлімгер» атты әлеуметтік медиа жобасы жүзеге аспақ. Жобаның негізгі мақсаты – жұмысшы мамандықтардың мәртебесін көтеріп, қоғамдағы маңызын арттыру, жастарға бағыт-бағдар беру және еңбектің құндылығын дәріптеу.

“Тәлімгер” жобасы екі кезеңнен тұрады:

Бірінші іріктеу кезеңі – қатысушылардың шығармашылық әлеуеті мен кәсіби дайындығын анықтау.

Екінші кезең – Сайыс. Іріктелген үміткерлердің шеберлігі сыналатын негізгі кезең.

Сайыс барысында қатысушылар төрт турдан өтеді. Жалпы ұпай санымен әр мамандық бойынша тек бір жеңімпаз анықталады. Қазылар алқасы кәсібилікке, жаңашылдыққа, ерекші қолтаңбалық стильге және еңбек сапасына ерекше мән бермек.

Жобаға 15 пен 25 жас аралығындағы жастар қатыса алады. Олар алты түрлі жұмысшы мамандық бойынша бақ сынайды:

• Дизайнер
• Тігінші
• Автомеханик
• Электрик
• Қолөнер шебері
• Аспаз-наубайханашы

Жеңімпаздар арнайы марапаттарға ие болып, қаржылай сыйлықтарғп ие болады. Жоба аясында әр сала бойынша  алты кәсіби маман тәлімгер ретінде бекітіледі. Олар – көп жылғы тәжірибесін жинақтаған, өз саласының үздіктері. Жас қатысушылар үшін бұл үлкен мүмкіндік болмақ: тәлімгерлер тек кәсіби бағыт-бағдар беріп қана қоймай, өз тәжірибелерімен бөлісіп, адал еңбектің қадірін сезіндіреді.

Түркістан өңірінде тұңғыш рет ұйымдастырылып отырған бұл жоба – жастарды еңбекке баулудың жаңа форматы. Жұмысшы мамандықтарын дәріптеу арқылы қоғамға нақты қажетті салаларға серпін беру көзделуде. «Тәлімгер» медиа жоба ретінде барлық сайыс кезеңі әлеуметтік желіде жарияланып, видео нұсқасы youtube платформасына жүктеледі.

“Бұл бастама – тек қана сайыс емес. Бұл – ең алдымен жастарға дұрыс бағыт көрсетіп, еңбек адамының мәртебесін көтеру, қоғамда жаңа көзқарас қалыптастыру. Жобаға қатысқан әр жас – болашақ кәсібінің абыройлы өкіліне айналады деп сенеміз”, – деп атап өтті.

Ұйымдастырушы: «Береке» қоғамдық бірлестігі

Байланыс: + 707 024 26 46