Қасиетті Түркістан төрінде, «Ақжайық» музыкалық мектебінің салтанатты сарайында «Аналар» республикалық журналының ұйымдастыруымен және облыс әкімдігінің қолдауымен “Тәуелсіздіктің бесігін тербеткен аналар” атты аналар форумы болып өтті.
Форумға қонақ ретінде ақын, Халықаралық “Алаш” әдеби сыйлығының лауреаты, қоғам қайраткері Ақұштап Бақтыгереева, журналист, “ҚР еңбек сіңірген қайраткері”, Ел анасы, Жамбыл облысының Құрметті азаматы Сәуле Мешітбайқызы,Түркістан облысы мәслихатының депутаты, “Amanat” партиясының Түркістан облысы бойынша атқарушы хатшысының орынбасары Қалыйма Жантөреева, журналист, “Қара шаңырақ” әлеуметтік жобасының авторы Тұрар Сәттерқызы қатысты. Жиынға Түркістан облысы ҚХА жанындағы Аналар кеңесінің төрайымы, Қ.А.Яссауи атындағы ХҚТУ-нің доценті, педагогика ғылымдарының кандидаты Гүлсара Тоққұлова модераторлық етті.
Форумға қатысқан ақ жаулықты аналар салтанатты залдың сәнін келтіріп, ажарын ашты. Аналар форумында облысымыздың түкпір түкпірінен келген аналар марапатталып, арнайы сый-сыяпаттарға ие болды. Іскер аналардан бастап алтын құрсақты қарапайым аналарымызға дейін төсбелгі тағылып, іс-шара жоғары деңгейде өтті. Сонымен қатар әсем әндер орындалып, келген қонақтарға, ақ жаулықты аналарға көтеріңкі көңіл күй сыйлады.
«Аналар» республикалық журналының редакторы Ажар Момбек мұндай форум ел бірлігін бекемдеуге зор үлес қосатынын атап өтті.
– Шама-шарқымыз келгенше елдің алдында журналымыз есеп берді. 4 жылда не атқардық, кімдерді насихаттадық, қоғамға нендей үлес қостық, үніміз қай жерге жетті? Осы сұрақтарға жауап бердік. Бес мыңға жуық ананы насихаттадық. Еленбей, көрінбей жүрген, бірақ еңбектері ерен аналарды насихаттадық. Олардың тәрбиелік мәні бар сұқбаттарын оқырманға тараттық. Біреуге ақыл айтудан аулақпын. Бірақ аналардың ақыл-кеңесі арқылы бір қыз етегін жинаса, бір ана даналыққа бет бұрса, бір жас ана отбасын сақтап қалса біз үшін ұлы жеңіс осы еді. Қоғамға қосқан үлесіміз де осы. Облыс бойынша 200-ге жуық ананың басын қосқан жиын болды. Тілеулес, жанашыр жандардың арқасында алып шықтық. Басты қонақ Ақұштап Бақтыгереева апам мен Сәуле Мешітбайқызы апам болды. Бүгінгі аналардың санасына сілкініс жасады. Бүгінгі қоғамның аузында тұрған проблеманы Ақұштап ақын өлеңмен жеткізсе, Сәуле Мешітбайқызы түйдек-түйдек сөзбен жеткізді. Сүбелі сөзге шөліркеген халықпыз ғой. Тыңдалды. Екі ел анасын тыңдармандары тырп етпей тыңдады. Осы іс-шараға қолдау білдірген барша азаматтарға алғысымды білдіремін, – деді шараның ұйымдастырушысы.
Айта кетейік, облыс орталығында әр тоқсан сайын Түркістан облыстық Қазақстан халқы Ассамблеясы жанындағы Аналар кеңесінің отырысы өтіп тұрады. Жиында Мемлекет басшысының ҚХА Кеңесінде берген тапсырмаларының орындалу барысы талқыланып, атқарылған жұмыстар сараланады. Сондай-ақ, қоғамдағы аналардың рөлі мен жауапкершілігі және ұрпақ тәрбиесі туралы ой қозғалып, жұмыс жоспары бекітіледі. Ұрпақ тәрбиесіне арналған жиында отбасылық құндылықтарды жүзеге асыру, дәстүрлі қазақ тәрбиесі туралы ұтымды ұсыныс-пікірлер айтылып, өмірлік тәжірибелер ортаға салынады. Бүгінде Аналар кеңесінің мүшелері қоғамдық іс-шаралар мен қайырымдылық акцияларына белсене атсалысып келеді.
