Түркістан қаласында Халықаралық туризм жəне меймандостық университеті мен облықтық қоғамдық даму басқармасы «Қоғамдық келісім» КММ-нің ұйымдастыруымен «Заманауи туристік индустрия: жаһандық өзгерістер, тұрақтылық және цифрлық болашақ» атты халықаралық ғылыми-теориялық конференциясы өтті.
Аталған шараның мақсаты – туризм саласындағы жаһандық үрдістер мен өзекті мәселелерді талқылау, тұрақты туризмді дамыту тетіктерін айқындау және цифрландыру жағдайында тәжірибе алмасу.
Конференция жұмысы аясында пленарлық отырыс өткізіліп, онда Қазақстан, Түркия, Өзбекстан, Әзербайжан және Ресей Федерациясынан келген ғалымдар мен сарапшылар баяндамалар жасады. Қатысушылар туризм индустриясындағы кадр даярлау мәселелері, экотуризмді дамыту, тарихи ынтымақтастықты дамыту, мәдени мұраны сақтау, сондай-ақ саланы цифрландыру мен басқарудың заманауи тәсілдері бойынша өз пікірлерін білдірді.
Іс-шараға Түркістан облысының қоғамдық даму басқармасы «Қоғамдық келісім» КММ басшылығы, Қазақстан халқы Ассамблеясы жанындағы ғылыми-сарапшылық топ мүшелері, жоғары оқу орындарының өкілдері мен сала мамандары қатысты.
Жиында «Халықаралық туризм жəне меймандостық университеті» КеАҚ Басқарма төрағасы-ректорының міндетін атқарушы Бекежан Мырзаев, Түркістан облысының қоғамдық даму басқармасы «Қоғамдық келісім» КММ-сі басшысы орынбасары Ерназар Баетов сөз сөйлеп, ашып берді.
Түркістан облысы тарихи-мәдени мұраға бай, бірлігі мен татулығы жарасқан, туристік әлеуеті жоғары өңір ретінде отандық және халықаралық туризмді дамытуда маңызды орын алады. Осыған байланысты өңірде туризмді жүйелі дамыту, инфрақұрылымды жетілдіру және қызмет сапасын арттыру мәселелері өзекті болып отыр.
Конференция қорытындысы бойынша туризм индустриясын дамытуға бағытталған бірқатар ұсыныстар әзірленіп, ғылыми және тәжірибелік ынтымақтастықты одан әрі нығайту қажеттігі атап өтілді.
Қатысушылар Түркістан өңірінің бірегей туристік мүмкіндіктеріне ерекше тоқталды. Әсіресе Қожа Ахмет Ясауи кесенесі сынды әлемдік маңызы бар тарихи нысандарды халықаралық деңгейде насихаттау, зиярат туризмін дамыту және туристер ағынын көбейту бағытында нақты ұсыныстар айтылды.
Сондай-ақ, конференция аясында тәжірибе алмасу, ғылыми зерттеулер нәтижелерін талқылау және туризм саласындағы инновациялық жобаларды таныстыру мүмкіндігі болды. Сарапшылардың пікірінше, мұндай кездесулер өңірдің туристік тартымдылығын арттырып қана қоймай, экономиканың өсуіне де оң ықпал етеді.
