Бүгін Түркістан қаласының әкімі Нұрбол Тұрашбеков “Түркістан қаласының даму көрсеткіші, өткен жылы атқарылған жұмыстардың қорытындысы және биылғы жұмыстардың жоспары” тақырыбында брифинг өткізді.
Ашық әкімдік жобасы бойынша:
Қазіргі таңда қала әкімдігі жанында «Халықтық кеңсе» мен «109» Бірыңғай байланыс орталығы тұрғындардың өтініштерімен жұмыс істеуде. Сонымен қатар, қала аумағында 6 сектор құрылып, тұрғындармен тығыз қарым-қатынаста өзекті мәселелерді шешуге өз үлестерін қосуда.
Жалпы өңірлік өнім
Жалпы атқарылған жұмыстардың нәтижесінде қаланы сипаттайтын басты көрсеткіш жалпы өңірлік өнім көлемі 2021 жылдың қаңтар-желтоқсан айына 268,8 млрд.теңгеге жетіп, 2020 жылмен салыстырғанда өсім 15,3% артты. Оның ішінде өнеркәсіп саласына 7,5 пайыз (20,0 млрд.теңге), ауылшаруашылық саласына 3,5 пайыз (9,5 млрд.теңге), орындалған құрылыс жұмыстары 66,4 пайыз (178,6 млрд. теңге), тауар айналымы және қызметтерді өткізу көлеміне 22,6 пайызы (60,7 млрд.теңге) тиесілі.
Өнеркәсiп және кәсiпкерлiк саласы
Өңірдің экономикалық дамуын анықтайтын басты сала – өнеркәсіп саласында 2021 жылдың қаңтар-желтоқсан айына 20 045,3 млн.теңгенiң өнімі өндіріліп, 2020 жылмен салыстырғанда өсім 5,2 % құраса, өнеркәсіптің басымды саласы өндеу өнеркәсібінде 12 498,3 млн. теңгенің өнімі өндіріліп, өсім 98,5 %-ға, электрмен жабдықтау, газ, бу беру көлемi 6 501, млн.теңгенi құрап, өсім 65,6 пайызға, сумен жабдықтау 988,5 млн. теңгенi құрап, 49,6 % пайызға артты.
Үдемелi индустриалды-инновациялық даму бағдарламасы аясында «Өңірлер кәсіпкерлігін қолдау картасына» құны 11 589,2 млн теңгені құрайтын 16 жоба енгiзiлген. Осы кәсіпорындарда 1002 жұмыс орын ашу көзделген. Осыдан 2010-2021 ж.ж. құны 11 106,4 млн. теңгенi құрайтын 15 жоба iске қосылып, 1922 жұмыс орны ашылды.
Индустриалды аймақ
Өздеріңізге белгілі, қалада «TURKISTAN» индустриалды аймағы жұмыс істейді. Алды осыдан алты жыл бұрын ашылған. «TURKISTAN» индустриалды аймағы: жалпы ауданы – 350 га құрайды. Сонымен қатар, 350 гектардың 180 гектары Арнайы экономикалық аймаққа (СЭЗ) берілуі жоспарлануда. Қазіргі таңда, Түркістан индустриалды аймағында 23 жоба орналасқан. Оның ішінде 17 жоба іске қосу актісі алған және жаңа 1922 жұмыс орны ашылған.
Туризм
Түркістан қаласында ағымдағы жылы ірі жобалар іске қосылып туризм саласы жаңа қарқын алды.
2021 жылы қаңтар-желтоқсан айларында Түркістан қаласына келуші зияратшылар мен туристердің саны 1 506,1 мың адамға жетті.
Инфрақұрылымды дамыту
Электр қуатымен қамту:
Қала тұрғындарының 98,5% электр қуатымен қамтамасыз етілген, оның 84% сапалы электр қуаты. 2021 жылдың қорытындысы бойынша 3 нысанның құрылысы 90%-ға орындалды. 2022 жылдың бірінші тоқсанында толық пайдалануға беріледі.
Сонымен қатар, 1 нысан жеке тұрғын үйлерді сапалы электр қуатымен қамту жобасы 2022 жылдан басталады. Нәтижесінде, қамту көрсеткіші 98,5 пайыздан 99 пайызға жеткізу жоспарланды.
Ауыз сумен қамтамасыз ету жүйелері:
Түркістан қаласының 36 174 (38 220 абонент) ішінде ауыз сумен 37 455 абонент (98%) қамтамасыз етілген (2022 жылдың соңына дейін 100 пайыз қамту жоспарланған).
Қала ішіндегі тұрғындарының көбеюіне орай «Орталық су қоймасын күшейту мақсатында қосымша сыйымдылығы 5000 м3 (2 дана) резервуарлардың құрылысы» аяқталып, тұрғындарға су берілуде.
Сонымен қатар, 2 нысанның арнайы жобалау сметалық құжаттамалары рәсімделіп, қаржыландыруға ұсынылған.
Жалпы қала көлемінде ауыз су құбырларын қайта жаңғырту мақсатында 4 нысанның құрылыс жұмыстары жүргізіліп, 40%-ға орындалды.
Сарқынды сумен қамтамасыз ету жүйелері:
Жалпы қала көлемінде 127 шақырым сарқынды су жүйесі, 27 дана КНС бар. Түркістан қаласы бойынша орталықтандырылған сарқынды су жүйесімен қамтылу көрсеткіші 20,5 пайызды құрады.
Түркістан қаласы бойынша орталықтандырылған сарқынды су жүйесін 32 680 абонент пайдалануда.
Түркістан қаласында жоба бойынша қуаттылығы тәулігіне 20 мың м3 сарқынды су тазарту ғимараты бар. Бүгінгі таңға пайдаланып жатқан, яғни қабылданып жатқан сарқынды су көлемі тәулігіне 4500 м3. 72 шақырым магистралды сарқынды су құбырлары қолданыста іске асырылуда.
Сарқынды сумен қамту жүйесі 14 нысан арқылы жүзеге асырылуда.
2021 жылы 3 нысаның құрылыс жұмыстары аяқталып, пайдалануға тапсырылды. Нәтижесінде 4800 жеке тұрғын үйге сарқынды су жүйесіне қосылуға қол жетімді болды. Қазіргі таңда 4 нысанның құрылысы жұмыстары жүргізілуде. 5 нысанның ЖСҚ әзірленіп, қаржыландыруға ұсынылған. 2 нысанның жобалау сметалық құжаттамалары рәсімделуде.
Құрылыс жұмыстары толығымен аяқталғаннан кейін 19 227 жеке тұрғын үй сарқынды су желісіне қосылуға болады.
Нәтижесінде 2025 жылы қала тұрғындары сарқынды су жүйесімен 100% қамтамасыз етіледі.
Табиғи газ:
Түркістан қаласында 6 сектор аумағында орналасқан тұрғындардың табиғи газбен қамтамасыз ету жұмыс жобалары толығымен аяқталған. Бүгінгі таңға жыл басынан бері қоса алғанда пайыздық көрсеткіш 90,2 пайызды құрады. Жергілікті әкімдік, еріктілер мен «ҚазТрансГазАймақ» АҚ бірлесе отырып, қала тұрғындарын толық табиғи газға қосу жұмыстары жүргізілді. Қала тұрғындарының өтініштерін ескере отырып, жобадан тыс қалып кеткен жеке тұрғын үйлерді табиғи газбен қамтамасыз ету үшін, арнайы жұмыс жобасы әзірленіп, құрылыс жұмыстары басталды. Нәтижесінде қала тұрғындарының табиғи газбен қамтылу көрсеткіші жоғарылайды.
Жылумен қамтамасыз ету:
Келесі мәселе – қаланы жылумен қамтамасыз ету. Қалаға сапалы жылу беру үшін тозығы жеткен құбырларды кезең-кезеңімен ауыстыру қажеттілігімен 1 нысан құрылыс және жөндеу жұмыстары жүргізіліп, жылу құбырларының тозу деңгейі шамамен 79 пайыздан 30 пайызға төмендеді.
2022 жылы тозығы жеткен 3,7 шақырым жылу құбыры жөнделіп, құбырлардың тозу деңгейі 30 пайыздан 10 пайызға төмендейді.
Жол:
2021 жылы Түркістан қаласында 15,1 шқ. құрайтын 11 көше орташа жөндеуден өтті. Бұл жөндеу жұмыстары коммуникациялық жүйелері (ауыз су, сарқынды су, газ) толығымен аяқталған көшелерде жүзеге асты. Топырақ жолдардың санын азайтып, тас жолдарыдың саны мен сапасын арттыру мақсатында 2021 жылы 158 шқ құрайтын 185 көшеге тас төселді.
2022 жылы Түркістан қаласына қарасты 46,4 шқ. құрайтын 40 көшеге орташа жөндеу жұмыстарын жүргізу жоспарлануда. Орташа жөндеу жұмыстары жүргізілетін көшелердің басым бөлігі коммуникациялық жүйелері (ауыз су, сарқынды су, газ) толығымен аяқталған, сондай-ақ, қоғамдық көліктер жүретін көшелер болып табылады.
29,63 шқ құрайтын 26 көшеге аяқжол (тротуар) салу жоспарлануда. Салынатын әлеуметтік нысандарға (мектеп, балабақша) барар жол бойындағы маңызды аяқжолдар.
Жарықтандыру:
2021-2022 жылдар аралығында Түркістан қаласында 267 шқ құрайтын 201 көшеге жарықтандыру жүйесін жүргізу жоспарланып, соның қазіргі таңда 147,8 шқ құрайтын 155 көшесі нақты жарықтандырылды. Ендігі кезекте 119,2 шқ құрайтын 46 көшені жарықтандыру жұмысы жалғасады.
2022 жылы қосымша 275,9 шқ құрайтын 272 көшеде жарықтандыру жүйесін жүргізу жоспарлануда.
Көлік инфраструктурасы:
Қаламыз халыққа қолайлы болу үшін қоғамдық көлік жүйесін одан әрі дамытамыз. Былтыр 40 жаңа автобус сатып алынып, жолға шықты, автобустар дизель отынымен жүреді, салқындатқышы бар, мүгедектерге қолайлы. Қоғамдық көлік 19 пайызға жаңарды.
Биыл 30 жаңа автобус қосылады. Өздеріңіз білетін Tolem жүйесін енгіздік. Бұл халыққа ыңғайлы, тасымалдаушыларға қолайлы жүйе.
Түркістан қаласында жалпы 24 қоғамдық көлік бағыты және 2 тасымалдаушы мекеме («Жолаушы» ЖШС, «ТехПрофАвто» ЖШС) тіркелген. Оның қазіргі уақытта 19 бағыты тұрақты тасымалдауды жүзеге асыруда. Қызмет көрсетіп жүрген қоғамдық көліктердің жалпы саны 220. Оның ішінде 60 данасы сыйымдылығы жоғары автобустар. 2021 жылы қалаға жаңадан 40 автобус алынып, жаңа №14, 15, 18 қалаішілік қоғамдық көлік бағыттары ашылды. Сонымен қатар, №1а бағытындағы ескі автобустар жаңартылған болатын. Қоғамдық көліктердің қызмет көрсету сапасын жақсарту мақсатында 2021 жылдан бастап қалаішілік №1, 1а, 30, 14, 15, 18 бағыттарын субсидиялау жұмыстары жүргізілуде. 2020 жылы қосымша жаңа 50 автобус алынып, қалаішілік №10 және 6 бағыттардағы шағын автобустарды сыйымдылығы жоғары автобустарға аустыру жоспарлануда. Сондай-ақ, қосымша 3 жаңа бағыттар (№16, №17, №20) ашу жоспарланып отыр. Бұл жаңадан ашылатын бағыттар Түркістан қаласының Баянауыл, Шәуілдір тас жолы бойындағы тұрғындарын қаланың орталық шегіне және әкімшілік іскерлік аумағына тасымалдайтын болады. Сондай-ақ, Түркістан халықаралық әуежайына тасымалдауды жүзеге асыратын бағыт қарастырылуда.
2022 жылы қалаішілік орталық көшелерге 100 дана аялдама павильонын орнату жоспарланып, қазіргі таңда орнатылатын аялдамалардың эскиз жобасы әзірленуде.
Тұрғын үймен қамтамасыз ету саласы
Қалада 15,6 мыңнан астам адам үй кезегінде тұр.
Былтыр «Нұрлы жер» мемлекеттік бағдарламасы аясында барлығы 600 мың шаршы метрді құрайтын 160 көпқабатты тұрғын үйдің құрылысы жүргізілді. Оның ішінде 170,2 мың шаршы метр құрайтын 42 тұрғын үй құрылысы аяқталып, 2 561 отбасы баспаналы болу мүмкіндігіне ие болды. Өткен жылы салынған үйлер бойынша қала тарихында рекордты көрсеткішке қол жеткіздік. 2020 жылмен салыстырғанда 6 есеге артық, дегенмен үй кезегінде тұрған азаматтар санын ескере отырып, бұл әлі де өте аз.
2014-2021 жылдары Түркістан қаласында тұрғын үй кезегінде тұрған тұрғын үйге мұқтаж отбасыларды баспанамен қамту мақсатында 2510 пәтер берілген болатын. Қазіргі таңда сол пәтерлердің дұрыс пайдаланылуы мен таратылуын реттеу мақсатында жұмысшы топ құрылды. Қаламыздың кейбір кезекте тұрған азаматтарының шағымдарын ескере отырып, жұмысшы топ бірнеше бағытта зерделеу жұмыстарын атқарады.
Биыл 400 мың шаршы метр тұрғын үйді пайдалануға беру жоспарлануда. 6 224 пәтер халықтың игілігіне беріледі деп күтілуде.
