Президент Қасым-Жомарт Тоқаев бұқаралық спортты дамытуда кешенді бағдарлама қабылдау керектігін жеткізген болатын.
«Ұлт денсаулығын бекемдеу мәселесі де өте өзекті. Барлық жас санаттары арасында бұқаралық спорт түрлерін насихаттай беру керек. Балалар үшін спорттық инфрақұрылымның барынша қолжетімді болуын қамтамасыз ету керек. Бұқаралық спортты дамыту – пирамидаға айналуы тиіс. Оның басына чемпиондар шықса, оның негізінде біз сау әрі саналы ұрпақты, мықты ұлтты қалыптастырамыз. Бұл бағыты заңнамалық тұрғыда жалғастырып, бұқаралық спортты дамытуда кешенді бағдарлама қабылдау керек. Маңызды міндеттердің бірі – жастар мен студенттерді ерікті жұмысқа тарту, оларға белсенді өмірлік позицияларды сіңіру. Бұл – азаматтық қоғамдық бекемдеуде жұмысымыздың маңызды бөлігі», – деді Мемлекет басшысы Қазақстан халқына Жолдауында.
Облыс орталығы – Түркістан қаласында халық арасында бұқаралық спортты дамыту бағытында түрлі жобалар жүзеге асырылып келеді. Балалар үшін спорттық шаралардың барынша қолжетімді болуын қамтамасыз ету – басты назарда. Соған сәйкес Түркістан қалалық «Балалар мен жасөспірімдер спорт клубы» қаладағы ашық алаңдарда тегін жаттығу сағаттарын жүргізіп жатыр. Қаланың 48 ашық алаңында ұйымдастырылған жаттығу сағаттарына 6-17 жасқа дейінгі азаматтар қатыса алады. Спорт клубының 28 спорт нұсқаушысы арнайы белгіленген ашық алаңдарда баскетбол, футбол, стритбол сынды спорт түрлерінен жаттығу сағаттарын өткізуде. Әр ашық алаңда ойындар аптаның дүйсенбі – жұма күндері, сағат 17:00-ден 21:00-ге дейін жалғасады.
Бұдан бөлек, Түркістан қалалық «Балалар мен жасөспірімдер спорт клубында» тегін үйірмелерде қарастырылған. Үйірмелерге 6 жастан 17 жасқа дейінгі жасөспірімдер футбол, стритбол, үлкен теннис сынды спорт түрлеріне жазылып, шыныға алады.
Айта кетейік, бүгінде спорт клубында 28 спорт нұсқаушысы, 20 жаттықтырушы жұмыс істейді. Спорт нұсқаушыларының еңбек өтілі 3 жылдан басталса, жаттықтырушылардың спортта 5 жылдық тәжірибесі бар.
Ақпарат алу үшін 8 707 222 17 10 байланыс нөмір арқылы хабарласа аласыздар.
