ТҮРКІСТАНДА ЖАЛПЫҚАЛАЛЫҚ СЕНБІЛІККЕ 800-ДЕН АСТАМ АДАМ ҚАТЫСТЫ

320

Мемлекет Басшысы Қасым-Жомарт Тоқаев өткен жылғы 2 қыркүйекте Қазақстан халқына Жолдауында “Таза Қазақстан”экологиялық акциясы туралы айтты. Ол елімізде көктемнен бастап “Таза Қазақстан”жалпыұлттық экологиялық акциясы өтіп жатқанын еске салды. Акцияның мақсаты — экологиялық мәдениетті қалыптастыру, “адал адам — адал еңбек — адал табыс” патриотизм құндылықтарын дәріптеу, сондай-ақ қоршаған ортаға ұқыпты қарау. Бұл, президент атап өткендей, “уақытша акция емес, бұл маңызды жоба жыл бойы жалғасуы тиіс”.

Осы ретте, «Таза Қазақстан» республикалық экологиялық акциясы аясында Түркістан қаласында кезекті жалпықалалық сенбілік өтті.
Қала аумағын абаттандыру мен санитарлық тазалықты қамтамасыз ету мақсатында өткізілген тазалық шарасына Түркістан қаласы әкімдігіне қарасты дербес бөлімдер мен 6 сектордың қызметкерлері, сондай-ақ облыстық басқармалар мен департаменттердің өкілдері белсене атсалысты. Жалпы саны 800-ден астам тұрғын сенбілікке қатысып, қала тазалығына өз үлестерін қосты. Сонымен қатар, тазалық жұмыстарына 15 арнайы техника жұмылдырылды.
Сенбілік барысында экологиялық тұрғыдан маңызды саналатын 18 учаске қамтылып, оның ішінде Водоканал маңы, Б.Майлин көшесі, Қалалық балалар ауруханасының аумағы, 160-квартал және Бекзат секторы сияқты аумақтарда санитарлық тазарту және көгалдандыру жұмыстары жүргізілді. Алдын ала белгіленген аймақтарда шөп шабу, жаяу жүргіншілер жолдарын сыпыру, тұрмыстық және табиғи қоқыс қалдықтарын жинау сияқты жұмыстар атқарылып, нәтижесінде 15 тоннаға жуық қоқыс шығарылып, арнайы полигондарға жеткізілді. Сонымен қатар, А.Жангелдин, Б.Майлин, С.Жандосов көшелерінде де санитарлық тазалау іс-шаралары ұйымдастырылып, абаттандыру жұмыстары жүргізілді.
Түркістан қаласы әкімдігі мен тиісті мекемелер тарапынан қоршаған ортаны қорғау, өңірдің экологиялық ахуалын жақсарту және қала аумағында санитарлық талаптарды сақтау бағытындағы жұмыстар алдағы уақытта да жүйелі түрде жалғасын табатын болады.

Президент қоғамда экология мәдениетін қалыптастыру, табиғатты аялау маңызды екенін атап өткен болатын. Бұл акция тұрғындар арасында экологиялық мәдениетті қалыптастыру, отансүйгіштікті, табиғатты қорғауға, қоршаған ортаға деген жанашырлық құндылықтарын дәріптеу. Әрбір адам өзінің ауласын, көшесін таза ұстап, тазалыққа өзінің үлесін қосу мақсатында ұйымдастырылуда. Осы орайда, Мемлекет басшысы Қасым-Жомарт Тоқаев «Таза Қазақстан» республикалық экологиялық акциясы аясында ұйымдастырылған жалпықалалық сенбіліктерге қатысып, ағаш отырғызған болатын. Президентпен бірге сенбілікке волонтерлер, «Ассамблея жастары» ұйымының өкілдері, еліміздің ғылым, креативті индустрия, мәдениет, спорт салаларындағы белсенді жастар және алдағы V Дүниежүзілік көшпенділер ойындарына қатысушылар, Президенттік жастар кадр резервінің мүшелері атсалысып, ағаш көшеттерін еккен болатын.

“Шын мәнінде, елімізді көгалдандыру, абаттандыру – үлкен мемлекеттік маңызы бар іс. Бұл бүгін шығып, ертең ұмытып кететін бір реттік науқан емес. Аталған жұмыс тұрақты түрде жүргізіледі. Туған жерімізді таза ұстауымыз керек. Бұл – жалпыұлттық мәселе. Қазақстанымыз таза болуы қажет. Лас елге қонақ ретінде, инвестор ретінде ешкім келмейді. Бірақ, ең алдымен, Қазақстанның таза, көрікті болғаны біз үшін, яғни халық үшін керек. Бұл күнделікті өмір салтына айналуы қажет. Сондай-ақ бұл жұмыс елорда және ірі қалаларда ғана емес, шағын қалаларда, аудандар мен ауылдарда да ұдайы ұйымдастырылады. Бүкіл Қазақстанды таза ұстау өзімізге, жастарға байланысты. Мен жастарға сенемін. Сондықтан жастарға зор үмітпен қараймын. Біз өз елімізді мақтан тұтуға тиіспіз. Мейлі ол көше, аула немесе үйлердің кіреберісі болсын, бәріне ұқыпты қарауымыз қажет. Вандалдармен табанды түрде күресу керек. Сондай-ақ олардың заң жүзінде қатаң жазаланатынын айттым. Әр нәрсенің шегі бар. Әйтпесе, бәрін бүлдіріп алып, кейіннен кешірім сұрайды. Елімізде тәртіп болуы керек. Заңды сақтау қажет.Біз қалалар мен ауылдарды абаттандыруымыз қажет. Әрбір үй, аула, тұрғын үй кешені, саябақ және басқа да нысандар әкімдердің де, жұртшылықтың да назарынан тыс қалмауға тиіс. Саламатты әрі жайлы орта қалыптастырамыз десек, азаматтар барынша белсенділік танытуы керек. Қоғам мүлкіне залал келтіретін адамдарды заңмен жауапқа тартамыз. Мұны, ең алдымен, әкімдерден талап етемін. Бәрін әкімге жүктеп, қарап отыруға да болмайды. Жаз маусымы басталды, енді ішкі туризм жандана түседі. Демалуға шыққан әр азамат табиғатқа жанашырлықпен қарауға тиіс. Тазалықтың басты кепілі – айналаны ластамау. Бұл – баршаға ортақ міндет”, – деді Мемлекет басшысы.
Қоршаған ортаның жай-күйіне бәріміз жауаптымыз. Мұны естен шығаруға болмайды. Экологиялық мәдениетті қалыптастырып, табиғатты аялау – міндет. Мұны Президент әр маңызды отырыста қозғап, халықтың есіне салып жүр. Мәселен сәуірде өткен Қазақстан халқы Ассамблеясының 33-сессиясында бұл – бірреттік іс-шара емес екенін айтты. Мемлекет басшысы Алматыда ғалымдармен кездескенде де осы мәселеге тоқталған. Жиында Президент «Таза Қазақстан» акциясы жай науқан емес, бұл – халқымыздың көзқарасын, болмысын өзгерте алатын өте маңызды жоба» деді. Қасым-Жомарт Тоқаев акцияның қалай жүріп жатқанын қадағалап отырғанын айтты.

Елімізде табиғатты аялау, қоршаған ортаны қорғауға бағытталған «Таза Қазақстан» республикалық акциясы әліде өтуде. Экологиялық науқанға еліміздегі 17 облыс пен 3 қаланың тұрғындары жаппай қатысып, туған жерін, тұрған аумағын таза ұстауға үлес қосуда. Әр өңірдегі жастар ресурстық орталығының бастамасымен қолға алынған акция 5 аптаға жоспарланған.  5 аптаны айырықша атауларға бөліп, қоршаған ортаға қажетті жұмыстарды нақтылап та берді. Алғашқы аптаға –«Таза өлке» деген атау берілген. Бұл апта жалпы республикалық сенбілікпен байланысты. Әр өңірдегі мекемелер, әлеуметтік нысандар мен тұрғындар өздері тұрған аумақты қоқыстан тазартты. Екінші апта –«Киелі мекен» деген атаумен айшықталды. Қазақта «Өлі риза болмай, тірі байымайды» деген қанатты сөз бар. Еліміз батырларға, ел басқарған ұлы тұлғаларға, Ұлт ұстаздарының рухына құрмет көрсетуді ұмытқан емес. Тарихы терең елде тарихи-мәдени ескерткіштер жетерлік. Бүгінде тарихи бейнесімен қатар туристік сипат алып келе жатқан орындарды таза ұстау бүгінгі ұрпақтың борышы. Ежелгі нысандардың тазалығы ұлттың рухани байлығын көрсетеді. Одвн соң, «Жасыл аймақ» деп аталады. Бұл аптада белсенділер мен тұрғындар көшет отырғызады. Жасыл желектерді баптап, зиянкестерге қарсы әктеу, дәрілеу жұмыстарын жүргізіп жатыр. Республикалық бастама аясында әр өңір жекелей науқандар ұйымдастыруда. Сонымен қатар, «Өнегелі ұрпақ» деп аталатын апта. Еріктілер мен белсенді тұрғындар қарттарға қамқорлық көрсетеді. Әр өңірдегі қарттар үйінің ауласын тазалап, қоршауын бояп, ақсақалдар мен ақжаулықты аналарға көмек көрсетеді. Мұндағы мақсат – «Қарты бар үйдің қазынасы бар» деген қанатты сөзді арқау етіп, жастардың үлкендерге деген құрметін арттыру, қарттарға деген ізгілікті дәріптеу. Қорытынды апта –«Мөлдір бұлақ». Акцияның аты айтып отырғандай, бұлақтардың көзі ашылып, өзен мен арық арнасы қоқыстан тазартылады. Тіршлік нәрін құрметтеу, оны таза ұстау тұрғындардың өздері үшін де ауадай қажет. Су қаталаған кезде шөліңді ғана қандырып қоймай, ауаны тазартатын, аптап ыстықта айналасына ылғалдылық сыйлайтын ерекше қасиетке ие. Одан бөлек жауынды күндері елдімекендер мен жолдарды су басудан сақтайтын да осы өзен мен арық.

Елді бірлікке, тазалыққа насихаттайтын «Таза Қазақстан» акциясын өткізуге Мемлекет басшысы Қасым-Жомарт Тоқаев ресми түрде тапсырма берген болатын. Бұл тазалықты насихаттап қана қоймай, ел-жұрттың басын біріктіретін рухани маңызы бар.

Ұрпақты тәрбиелеу үшін ең алдымен өзімізді тәрбиелеуіміз керек. Айналаны таза ұстап, қоршаған ортаға құрметпен қарасақ, тазалыққа жаны жақын ұрпақ қалыптасатыны ақиқат. Рас, «балапан ұяда нені көрсе, ұшқанда соны іледі». Жадыңда, жанарыңда, жүрегіңде ғана тұрар ақ мекен, көркем өңір, әсем өлке өсер ұрпағына да нұрын сыйлап, ғасырлардың көшінде жасанып, жайнап, жаңғыра берсін!