Бүгін Түркістан қаласында Қазақстан Республикасының Ұлттық қауіпсіздік комитеті Шекара қызметінің әскери бөлімдеріне жас сарбаздарды салтанатты түрде шығарып салу рәсіміне қатыстым.

Бұл шара Түркістан қаласы әкімдігінің Ішкі саясат бөлімі «Жастар ресурстық орталығы» КММ-нің ұйымдастыруымен өтті.

Іс-шараның негізгі мақсаты – жас буынға елін, жерін қорғау қасиетті борыш екенін сезіндіру, патриоттық тәрбие беріп, отансүйгіштік құндылықтарды насихаттау болды.

Рәсім Мемлекеттік Туды енгізу және Әнұранды орындаумен басталды.

Шара барысында Ардагерлер алқасының төрағасы Жарқынбек Құлбайымбетов, Сауран ауданының қорғаныс істері жөніндегі біріктірілген басқарма бастығы полковник Нуржанов Дилмурад Абдурашитұлы, сондай-ақ әскери ардагерлер мен қоғам қайраткерлері жас сарбаздарға ақ тілектерін арнап, ыстық ықылас білдірдік.

Сөз сөйлеген қонақтар ел қорғаудың маңызын атап өтіп, сарбаздарға абыройлы қызмет тілеп, ата-аналарға алғыстарын жеткізді.

Шара барысында патриоттық әндерден тұратын концерт қойылып, сарбаздардың ата-аналары мен жас сарбаздар жүрекжарды лебіздерін білдірді. Жас сарбаздарға естелік сыйлықтар табыс етіліп, рәсім соңында оларды казармаға шығарып салу өтті.

Бұл салтанат – елін қорғауға қадам басқан жас сарбаздарға рух беріп қана қоймай, жастарға отансүйгіштік пен батырлықтың асыл өнегесін насихаттаған тағылымды шара болды.