Ақтау қаласында жастар мен жасөспірімдер арасында бокстан Қазақстан чемпионаты аяқталды. Рингке еліміздің ең талантты деген жас боксшылары шығып, шеберліктерін көрсетті. Республикалық жарыста Түркістан облысының намысын қорғаған жерлестеріміз өздерінің мықтылықтарын көрсетіп, туған елге жүлдемен оралды.
Шаршы алаңда көпшілікті, талантымен таң қалдырған Түркістан облысының басты үміті Шұғыла Нәлібай 75 келіде өнер көрсетіп, бас жүлдені қанжығасына байлады. Сонымен қатар, шаршы алаңда жұдырықтасқан жерлесіміз Ажар Ташкенбай да 52 келіде жеңімпаз атанды. Ал, 70 келіде жұдырықтасқан бұрымдылар арасына жерлесіміз Гаухар Шайбековаға тең келер қарсылас болмады. Ол — ел чемпионатында алтын алқаның иесі атанды. Жеңістің шыңын бағындырған арулар қатарында дарынды спортшы Аида Сарибарованың да бағы жанды. 75 келіде рингте бағын сынаған Аида жеңіс тұғырының бірінші ең биігінен көрінді.
Ал, республикалық бокс бәсекесінде 7 қыз қола медальді олжалады. Олардың қатарында: 46 келіде Әсем Муратова мен 48 келідегі Әсел Жақып, 46 келідегі тағы бір бұрымды Мәншүк Тұрғанбай, 48 келіде Делфина Әбілхан мен 54 келіде Аяулым Пердебай, сонымен бірге 57 келіде Аружан Аманкелді мен 66 келіде Арайлым Нұрбаш та қола алқаны қанағат етті.
Естеріңізге саламыз, бокстан бұрымдылар арасында өткен ел чемпионатында жеңімпаз және жүлдегер болған спортшы арулар Түркістан облысының №5 олимпиада резервінің мамандандырылған балалар мен жасөспірімдер спорт мектебінің шәкірттері. Жаттықтырушысы Түркістан облысының бокстан қыздар арасында аға бапкері Серік Абдулланың жан-жақты дайындауының арқасында, спортшылар жоғары жетістікке жетуде.
