Түркістандық жекпе-жек шебері Акбар Елубайұлы, Испания елінде өткен Еуропа чемпионатына қатысып, жеңімпаз болды. Бүгінде жекпе- жек өнерінен бақ сынап жүрген жерлесіміз, жеңіс тұғырының ең биік сатысына шықты. Акбар Елубайұлы жекпе- жек спортының бірнеше түрінен әлемдік сайыста жеңімпаз болған сақа спортшы. Еркін күрестен Азия чемпионатының күміс жүлдегері, Джиу джитсудан әлем чемпионы, Панкратионнан әлем чемпионатының күміс жүлдегері.
Акбар Елубайұлы 1994 жылы Созақ ауданында туған. Ол – еліміз үшін таныс есім. Тұтас оңтүстік өңірі бұл жігітті мақтан тұтады. Атқа мінсе, қарсыластың мысын басып тұрады. Көкпаршы. Айтулы додаларда серкені өңгеріп, талай салым салған. Тақымы мықты. Сосын, қазақы тойдың сәнін келтіретін қошқар көтеруден, алдына жан салмайды. Екі жылда отыз қошқарды өңгеріпті. Еріксіз таңдай қағасың, ия!
«Алып – анадан туады», Акбардай палуанды тоғыз ай көтерген анасы Ғалия да, кенжесінің тілеуін тілеп отырған аяулы жан. Әкесі Елубай, баласы додаға түссе тақымын қысып, қашанда жанынан табылады. Қос ағасы Нұрғали мен Ерғалида бауырының бабын тауып, білген ақыл кеңесін аямайды. Қыз апасы, Әселдің жөні бір бөлек.
