Түркістан облысында олимпиаданың көркін қыздыратын күрес түрлері қазір халықаралық деңгейге сай дамуда. Өңірімізде ауыл жастарының күреске деген қызығушылықтары өте жоғары.
Жақында Араб елдерінің Бахрейн мемлекетінде еркін күрестен кіші жасөспірімдер арасында Азия чемпионаты аяқталды. Боз кілемде белдескен сары құрлық елдерінің ең талантты деген жас балуандары арасында еліміздің намысын қорғаған Түркістан облысының талантты балуаны Асамбек Бекасыл Азия чемпионы атанып, жерлестерін қуантты.
Бекасыл 48 келі салмақта өнер көрсетіп, құрлық додасында қарсыластарын жеңіп, алтын медаль иеленді. Жеңімпаз балуанның жеке бапкері, күрестің білікті маманы Мықтыбек Қуашов. Ал, облысымыздың еркін күрестен жасөспірімдер құрамасының аға бапкері Абылайхан Рыспаев. Түркістан облысында жаңадан бой түзеген спорт кешендеріндегі күрес залдары, оқу-жаттығу сабақтарын өткізуге өте ыңғайлы болғандықтан жергілікті спортшы жастарды жеңіске жетелеуде.
