Ағымдағы жылдың 13 шілдесінде Петропавл қаласында мемлекеттік қызметшілер арасындағы республикалық спартакиаданың ашылу салтанаты өтті. Жарысқа 15 өңірден 600-ден астам спортшылар қатысуда.
Бұл спартакиаданың мақсаты – мемлекеттік қызметшілер арасында салауатты өмір салтын насихатту ғана емес, жалпы мемлекеттік қызметтің оң имиджін қалыптастыру.
– Петропавл қаласында мемлекеттік қызметшілер арасындағы спартакиаданың ашылу салтанаты жоғары деңгейде өтті. Оған еліміздің барлық өңірінен 600-ден астам спортшы қатысып жатыр. Кіші футбол, тоғызқұмалақ, волейбол, қазақ күресі, бильярд, үстел теннисі және жүзуден жүлделер сарапқа салынады. Түркістан облысының құрама командасы сақадай сай. Күні кеше мандаттық комиссия отырысы өтті. Өңірлерден мықты командалар келіпті. Жалпы шаһар әдемі екен. Шағын, жасыл, жайлы. 250 мыңнан астам тұрғыны бар. Стадионы, спорт нысандары тәуір екен. Түнге таман автобустан түсе сала кешкі Қызылжардың орталығын аралап көрдік. Әріптестерімізге жеңіс тілеймін. Спорттың 7 түрінен жүлделер сарапқа салынбақ. Жалпы бұқаралық спортты дамыту өте маңызды. Бізге тек Олимпиада чемпиондары емес, тұтас елдің денсаулығы қажет. Бұл ретте түрлі сала өкілдерінің спартакиадалары өтіп жатыр. Түркістан облысы әкімдігі мен дене шынықтыру және спорт басқармасына рахмет. Барлық спорт түрінен команда жіберді. Ендігі мақсат — сенімді ақтау!, – дейді облыстың намысын қорғап жатқан команданың белді өкілі Ғабит Сапарбеков.
Айта кетейік, жарыстар шілде айының 13-15 күндері спорттың қазақ күресі, тоғызқұмалақ, бильярд, волейбол, шағын футбол, үстел теннисі және жүзу түрлерінен жүлделер сарапқа салынатын болады. Жарысқа қатысушы түркістандық спортшыларымызға сәттілік тілейміз!
