Қала аумағындағы 787 көшеге санитарлық тазалық жүргізіледі. Оның 136 көшесі – механикалық жолмен, 651 көшесі қолмен тазаланады. Орталық маңызы бар 39 көшенің қоқысы күніне екі мезгіл алынады.
Бұл жұмыс секторлар тарапынан да күнделікті бақылануда. Нәтижесінде, тазалық талаптарын бұзған 4570 азаматқа айыппұл салынды: “Отырар” секторында – 37 , “Сауран” секторында – 106, Бірлік тұрғын алабында – 38, “Шауғар” секторында – 66, “Бекзат” тұрғын алабында-45, “Яссы”секторында – 65 азаматқа хаттама толтырылды.
Түркістан қаласының полицейлері қылмыстық құқық бұзушылықпен күрестен бөлек, қоғамдық орындарды ластауға байланысты құқық бұзушылықтарды болдырмауда профилактикалық жұмыстарды тұрақты түрде жүргізіп отырады. Алайда тұрғындар тарапынан өзінің тұрғылықты мекенжайының тазалығына немқұрайды қарайтын, қандай да бір қоқыс, қалдығын кез келген жерге тастап ластайтындар табылып жатады.
Осы орайда, Қазақстан Республикасы Әкімшілік құқық бұзушылық туралы заңының 434-2-бабына сәйкес, ортақ пайдаланылатын орындарды, саябақтарды, скверлерді ластау, оның ішінде белгіленбеген орындарға коммуналдық қалдықтарды тастау – әкімшілік жауапкершілікке алып келетіні, 5 АЕК мөлшерінде айыппұл белгіленгені туралы тұрғындарға түсіндірілуде.
Сондай-ақ, әкімшілік жаза қолданылғаннан кейін бір жыл ішінде осы әрекеттер қайталанған жағдайда айыппұл мөлшері 10 АЕК-ке ұлғаятыны ескертілуде.
Түркістан қаласы аумағының тазалығын сақтау мақсатында полиция қызметкерлері профилактикалық рейдтік шараны күнделікті жүргізетінін назарларыңызға саламыз.
