Президент Қ.Тоқаев әкімдердің халықпен кездесулерін тек жоспарланған кесте бойынша ғана емес, сонымен қатар тұрғындардың талап-тілегіне сәйкес икемді түрде өткізуі тиіс екенін атап өтті. Президент Қасым-Жомарт Тоқаев әкімдердің халықпен тұрақты әрі тиімді кездесулер өткізуін мемлекеттік басқару жүйесінің маңызды бөлігі ретінде қарастырады. Мемлекет басшысы «Әкімдердің халықпен кездесулер өткізуі туралы» Жарлыққа қол қойып, барлық деңгейдегі әкімдерге жыл бойы тұрғындармен кездесулер өткізуді міндеттеді. Бұл кездесулерде әлеуметтік мәселелерге баса назар аударып, халықты толғандыратын проблемаларды шешу жолдары мен мерзімдерін түсіндіру көзделген. Мемлекет басшысы әкімдердің халықпен жиі және ашық кездесулер өткізуі қоғамдағы сенімді арттырып, жергілікті басқару органдарының ашықтығы мен есептілігін қамтамасыз ететінін бірнеше рет атап өтті. Бұл тәсіл Жаңа Қазақстанды құру стратегиясының маңызды бөлігі болып табылады.
Осы ретте,Түркістан қаласының әкімі Әзімбек Пазылбекұлы халықпен көшпелі кездесу барысында бүгін Бекзат секторының тұрғындарымен кездесті. Бекзаттық тұрғындар қоғамдық көлік қатынасы, инфрақұрылым сапасы және жер мәселелері бойынша қала басшысына өз мәселелерін жеткізді. Әзімбек Пазылбекұлы барлық сұрақтарды тыңдап, уақыт күттірмейтін мәселелерді сол жерде шешіп, жауапты сала басшыларына нақты тапсырмалар жүктеді. Осыған дейінгі Бекзат секторы тұрғындары мен әкім кездесуінде 34 мәселе көтерсе, олардың 20-сы бүгінде шешімін тауып, 14-і бойынша тиісті жұмыстар жүргізілуде. Секторда инфрақұрылымдық жобалар жүйелі түрде іске асырылуда. Атап айтқанда, Қойшыбаев көшесіндегі ескі трансформатор жаңартылып, балалар ойын алаңы жөндеуден өтті. №18 мектеп аумағында спорт және ойын алаңдарының құрылысы 90 пайызға аяқталды.
Байланыс сапасын арттыру мақсатында Айдын және Мұзтау көшелеріне ұялы байланыс операторларының базалық станциялары орнатылды. Қосымша үш мұнара орнату көзделуде. Сонымен қатар, бірқатар көшелерге үй интернеті жеткізіліп, жыл соңына дейін Бекзат секторына 35 бейнебақылау камерасын орнату жоспарланған.
Кездесу соңында Әзімбек Пазылбекұлы тұрғындарды қоғамдық тәртіп пен қалалық тазалықты сақтауға белсенді атсалысуға шақырып, жеке қабылдауға жазылған азаматтарды қабылдады. Айта кетейік, қала әкімі Әзімбек Пазылбекұлының халықпен кездесуі ертең де Мәдени рухани орталықта орналасқан «Ұлы-дала орталығы» кешенінде жалғасады.
Сонымен қатар, 28 мамыр күні Түркістан қаласының тұрғындарымен кездесу барысында Әзімбек Пазылбекұлы Яссы және Бірлік секторының тұрғындарымен кездесті. Бірлік тұрғындарымен кездесу барысында 2024-2025 жылдары тұрғындар көтерген мәселелердің орындалу барысы мен алдағы жоспарлар туралы баяндап, тұрғындардың ұсыныс-пікірлерін тыңдады. Жергілікті тұрғындар тарапынан инфрақұрылым жүйелерін дамыту және жол мәселелері көтерілді.
Бірлік секторы бойынша алдыңғы кездесуде 21 мәселе тіркеліп, оның 12-сі шешімін тапса, 9 мәселе бойынша тиісті жұмыстар жүргізілуде. Сектордың инфрақұрылымын дамыту бағытында да бірқатар жұмыстар атқарылуда. Ауыз су, кәріз, электр және газ жүйелерін жетілдіруге арналған жобалар кезең-кезеңімен жүзеге асырылып келеді. Мәселен, электр жарығымен қамту бойынша 2704 абонентті қамтитын жоба шеңберінде 14 дана трансформатор орнатылып, құрылыс жұмыстары 2026 жылы аяқталады деп жоспарлануда. Сонымен қатар, табиғи газ желісімен қамту мақсатында қосымша 1500 абонентке арналған жоба әзірленуде, оның ішінде 326 абонент Бірлік секторынан енгізілген. Жол және жарықтандыру саласында 141,7 шақырымдық 179 көшенің 96%-ы жарықпен қамтылған, қалған бөлігінде жұмыстар биылғы жылдың тамызына дейін аяқталады деп күтілуде.
Кездесу соңында қала әкімі тұрғындарды қоғамдық тәртіп пен қалалық тазалықты сақтау шараларына белсенді қатысуға шақырып, көтерілген барлық мәселелер кезең-кезеңімен заң аясында шешілетінін жеткізді. Барлық ұсыныстар хаттамаға енгізіліп, салалық бөлімдерге нақты тапсырмалар берілді. Айта кетейік, Әзімбек Пазылбекұлының халықпен кездесуі 28 мамыр күні сағат 10:00де – 1-ші мөлтек ауданында орналасқан №4 мектепте, 15:00де – Сандыбаев көшесіндегі №18 мектепте, 29 мамыр күні сағат 10:00де- Мәдени рухани орталықта орналасқан «Ұлы-дала орталығы» кешенінде, 15:00де- ӘІО-ғы 9-шы көше бойында орналасқан №33 мектепте өтеді.
Сонымен қатар, Түркістан қаласының әкімі кезекті көшпелі кездесулер аясында Әзімбек Пазылбекұлы Сауран секторының тұрғындарымен кездесті.
Кездесу барысында қала басшысы 2024 жылы тұрғындар тарапынан көтерілген мәселелердің орындалу барысы және сектор аумағында атқарылып жатқан жұмыстар жайында баяндады. Сонымен қатар, алдағы кезеңге жоспарланған жобалармен таныстырып, тұрғындармен ашық диалог орнатты. Жиын барысында жергілікті тұрғындар жол сапасы мен қауіпсіздігі, тұрғын үй аулаларының тазалығы, ойын алаңшалары мен қоғамдық көлік қатынасы, инфрақұрылым сапасы сынды мәселелерді көтерді. Әзімбек Пазылбекұлы тұрғындардың барлық сұрақтарына жауап беріп, тиісті сала басшыларына нақты тапсырмалар берді.
Сауран секторында инфрақұрылымдық жобалар жүйелі түрде кезең-кезеңімен жүзеге асырылуда.
Қазіргі таңда А.Жангелдин көшесінде жаңа ойын алаңшасын салу, Б.Майлин көшесіндегі айналма жолда МАФ орнату, сондай-ақ №1,2 мөлтек аудандарда аулалық аумақтарды абаттандыру, ойын алаңшаларын ағымдағы жөндеу және жарық шамдарын ретке келтіру жұмыстары жүргізілуде. Сондай-ақ, О.Жарылқапов көшесінде жол белгілерін орнату, Әл-Фараби көшесінде жол жөндеу жұмыстары толығымен аяқталса, Энергетиктер көшесінде аулаішілік абаттандыру жұмыстары бастау алды. Сонымен қатар, сектордағы жаңадан қоныстанған тұрғын үйлерге су жүйелерін тарту және қайта құру бойынша 2-кезек жобасы әзірлену үстінде. Аталған нысанның құрылыс жұмыстарын 2026 жылы бастау жоспарланып отыр.
Кездесу соңында қала әкімі тұрғындарды жеке мәселелері бойынша қабылдап, арыз-шағымын тыңдады.
Айта кетейік, Әзімбек Пазылбекұлының халықпен кездесуі бүгін, 28 мамыр күні 15:00де – Сандыбаев көшесіндегі №18 мектепте, ертең, 29 мамыр күні сағат 10:00де- Мәдени рухани орталықта орналасқан «Ұлы-дала орталығы» кешенінде, 15:00де- ӘІО-ғы 9-шы көше бойында орналасқан №33 мектепте жалғасады.
Қасым-Жомарт Тоқаев “Әкімдердің халықпен кездесулер өткізуі туралы” жарлыққа қол қойған болатын. Құжатта “Барлық деңгейдегі әкімдер жыл бойы халықпен кездесулер өткізсін, олардың барысында халықты толғандыратын әлеуметтік мәселелерге баса назар аудара отырып, Қазақстанды жаңғыртудың жаңа бағдарының негізгі бағыттары туралы хабардар етсін және проблемалық мәселелерді шешудің жолдары мен мерзімдерін түсіндірсін” деп жазылған.
Жарлық бойынша, облыс әкімі жарты жылда бір рет “әр ауданда және облыстық маңызы бар әр қалада кемінде бір көшпелі кездесу”, республикалық маңызы бар қала, астана әкімі “қаланың әр ауданында тоқсан сайын кемінде бір көшпелі кездесу”, аудан әкімі “әр ауылда, кентте, ауылдық округте, аудандық маңызы бар қалада тоқсан сайын кемінде бір көшпелі кездесу” өткізуі тиіс.Әкім кездесулерінің “икемді жылдық” күнтізбесі “қажет болған жағдайда” тиісті мәслихаттың келісімімен жыл басында әзірленіп, жыл сайын 20 қаңтарға дейін үкіметке ұсынылуы қажет.Сонымен қатар, әкім “халықтың талап етуі бойынша және қажет болған кезде” халықпен күнтізбеден тыс кездесіп отыруы тиіс болады.
Құжатта әкім кездесуінің регламенті де нақтылана түскен. Енді аймақ басшысы жоспарланған уақыттың “төрттен бірден аспайтын бөлігін” баяндама оқуға арнайды, ал қалған уақытты “сұрақ-жауап” форматында өткізеді. Бұл үшін әкім алдын ала жергілікті қоғам өкілдерінен “халықтың сұрауы мен ұсыныстарын жинау жөнінде комиссия” құрады.“Әкімдік пен әкім аппараты кездесуге мүдделі адамдардың ауқымды аудиториясын, оның ішінде мәслихат депутаттарын, партия, қоғамдық ұйым және оппозиция өкілдерін тартсын” делінген жарлықта.Сарапшылардың айтуынша, Қазақстанда тіркелген оппозициялық партия жоқ, соңғы жылдары бірде-бір жаңа партия тіркеуден өтпеген. Соңғы кезде “парламенттік оппозиция” ұғымы енгізіліп, парламентке өткен президентшіл партиялардан “саяси оппозиция жасауға” талпыныс байқалған. Ал үкіметке, аймақ басшыларына қарсы пікір айтатын белсенділер жиі қудаланады, әкім жиындарына жергілікті белсенділер қатыстырылмай жатады. Сондықтан құжаттағы “оппозиция өкілдері” деген кімдер екені түсініксіз.
Әкімдер бұған дейін де “халықпен кездесу жиындарын” өткізіп келген. Бірақ ол жиындар көбіне ұзақ баяндама, алдын ала дайындалған сұрақтар түрінде өткізіліп, халықтың сынына жиі ұшырайтын. Дайындалған адамдар жиын өтетін орындарға күні бұрын келіп, белсенділерге орын жетпей қалатын кездер де болған. Жаңа ереже бұл олқылықтың орнын қалай толтырады, ол жағы белгісіз.Бұған қоса, жарлықта көрсетілген “Қазақстанды жаңғыртудың жаңа бағдары” не екені де нақтыланбаған. Бұрынғы жиындарда көбіне президент жарлығы, үкіметтің жаңа бағдарламасы сияқты құжаттарды насихаттауға басымдық берілетін.Елде облыстардың және республикалық маңызы бар қала әкімдерін президент тағайындайды. Одан төмен деңгейдегі әкімдерді жоғары тұрған әкімдер қызметке қояды. Сондықтан әкімдер халықпен кездесуге мүдделі емес деген сыни пікір жиі айтылады.
