Белгілі балуан жерлесіміз Акбар Елубайұлы спорттың 5 түрінен спорт шебері атанды. Жуырда ғана Ақтөбе қаласында грепплингтен Қазақстан Республикасының чемпионы болып, спорт шебері дәрежесін алды.
Күрестің әдіс тәсілінен бөлек, аяқ-қолды бұрап, қылқындыру әдісіне негізделген грепплинг жүректілікті қажет етеді. Шілде айының 2-3 күні Ақтөбе қаласында өткен ел чемпионатында жерлесіміз, талантты спортшы Акбар Елубайұлы қарсыластарын жеңіп, тұғыр биігінен көрінді. Жекпе- жек спортының еркін күрес, джиу джитсу, панкратион, ММА түрлерінен әлемдік жарыстарда жүлде салған жерлесіміз енді міне, грепплингтен спорттық дәрежені орындап, ҚР чемпионы атанды.
Акбар Елубайұлы – Қазақстандағы ірі ММА ұйымының бірі «Naiza fighting championship» промаушенімен келісім шартқа отырып, жауынгері атанды. Алдағы уақытта кәсіпқой спортта бақ сынайды.
Акбар Елубайұлы 1994 жылы Созақ ауданында туған. Ол – еліміз үшін таныс есім. Тұтас оңтүстік өңірі бұл жігітті мақтан тұтады. Акбар жарысқа шықса теріскейліктер тақымын қысады. Тайлы тұяғымен. Себебі, елдан асқан өнері, мыңды састырған машығы бар. Тіл көзіміз тасқа бірақ жасаған берген, бір басына бұла күшті аямай берген. Күрессе, белдескенді атып ұрады. Атқа мінсе, қарсыластың мысын басып тұрады. Көкпаршы. Айтулы додаларда серкені өңгеріп, талай салым салған. Тақымы мықты. Сосын, қазақы тойдың сәнін келтіретін қошқар көтеруден, алдына жан салмайды. Екі жылда отыз қошқарды өңгеріпті. Еріксіз таңдай қағасың, ия! «Алып -анадан туады», Акбардай палуанды тоғыз ай көтерген анасы Ғалия да, кенжесінің тілеуін тілеп отырған аяулы жан. Әкесі Елубай, баласы додаға түссе тақымын қысып, қашанда жанынан табылады. Қос ағасы Нұрғали мен Ерғалида бауырының бабын тауып, білген ақыл кеңесін аямайды. Қыз апасы, Әселдің жөні бір бөлек.
