Жуырда еліміздің ең талантты деген спортшы ұл-қыздары Көкшетау қаласында өткен тоғызқұмалақтан Азия кубогіне қатысты өтті. Қазақстанның намысын қорғаған Түркістан облысының жеңімпаз саңлақтары тамаша ойын өрнегін көрсетіп, жеңіске жетті.
Сары құрлық елдерінің спортшылары бас қосқан бұл Кубокте ересектер және жастар құрамасы күш сынасты. Елімізге танымал түркістандық спортшы қыз Әсел Далиева ересектер арасында рапид сайысы бойынша өзінің теңдессіз шеберлігін көрсетіп, бас жүлдені жеңіп алды. Орта Азия елдері арасында үздік спортшы саналатын жерлесіміз Әсел алтын медаль иеленді. Бұдан басқа дарынды қыз классика сайысы бойынша күміс жүлдегер, ал блиц жарысында қола жүлдегер атанды.
Әсел ұлттық ойынды бала күнінде ойнай бастаған. Ол 12 жасында спорт шебері, 16 жасында халықаралық деңгейдегі көрсеткіштердің барлығын орындаған ең жас спортшы атанды. 2013 жылы әлем чемпионы Азияда ойындарының алауын тұтату құрметіне ие болды.
Тоғызқұмалақ ойынының тарихының тамыры терең. Бұл ойын 4 мың жыл бұрын пайда болған. Алайда аталған ойын Қазақстан және Қырғызстан халқының арасында кең тараған. Қазіргі уақытта Әселдің арманы – тоғызқұмалақ ойынының кең танылуына үлес қосып, зияткерлік мектеп ашу. «Тоғызқұмалақтың шахмат ойынына ұқсастығы бар. Бұл тек бергі жағы. Бізде көрсеткіш те, сағаттар да бар. Алайда, іс жүзінде, екеуі –мүлдем өзге ойындар. Әрқайсысының өз ерекшелігі бар. Тоғызқұмалақты хакім Абай да жақсы көрген. Ол өзінің тақтасын мұраға қалдырды. Менің ойымша, балаларымыз тоғызқұмалақ ойынын жан-тәнімен ойнау үшін, оны ұлттық брендке айналдыруға болады», – дейді Әсел.
Көкшетаудың тамаша баурайында тоғызқұмалақтан аяқталған бұл жарысқа тағы бір жерлесіміз Каримова Лина қатысып, рапид сайысы бойынша қола жүлдегер атанды. Ал жаста болса жеңіске деген құштарлығы басым Түркістан облысының өкілі Аружан Салман 19 жасқа дейінгі жастар арасында рапид түрінен күміс жүлдені иеленіп, туған елге олжалы оралды. Бұл жеңімпаз саңлақтар білікті басшы Ғани Ахметбаев жетекшілік ететін Түркістан облысының ұлттық спорт мектебінің талантты шәкірттері.
