Қырғызстан Республикасының астанасы Бішкек қаласында 1-4 шілде аралығында гір көтеру спортынан, жасөспірімдер арасында әлем чемпионаты өтті. Әлемдік додада Қазақстанның атынан созақтық гір тасын көтеру шеберлері де қатысты.
Аудандық №2 балалар мен жасөспірімдер спорт мектебінің бірнеше спортшылары тұғыр бигінен көрінді. 63 келі салмақта Орынбасар Баби серпе көтеруден әлем чемпионы атанды. Сондай-ақ Еркебұлан Ергешбай 53 келі салмақта жұлқа көтеруден күміс медаль еншіледі. Тағы бір гір тасын көтеру шебері Бақыт Мақсатұлы 58 келі салмақта серпе көтеруден қола медальді иеленді.
Спортшыларды байрақты бәсекеге дайындаған ҚР еңбек сіңірген жаттықтырушысы, Мұрат Серікбаев: «Орынбасар Баби жасөспірімдер арасында әлемнің екі дүркін чемпионы атанып отыр. Төккен тер нәтижесін беріп, үлкен жетістікке жетті. Осындай талантты шәкірттерімнің барына қуанамын», – дейді.
