Шымкенттегі кешенді жоғары спорт шеберлігі мектебінде таеквондодан жастар мен жасөспірімдер, кадеттер арасында Қазақстанның еңбек сіңірген жаттықтырушысы Шадияр Қондыбаевтың жүлдесіне арналған республикалық ашық турнир өтті.
Елімізде таеквондо спортының өркендеуіне мол үлесін қосып келе жатқан білікті спорт маманы, кезінде өзі де спортшы болған Шадияр Қондыбаевты көпшілік жақсы біледі. Қазақстан спортының тарихына есімін алтын әріптермен жазып қалдырған атақты Мұзтафа Өзтүрікпен қатар кезінде жекпе-жек өнерінде де бірге шыңдалған. Бұл жарысқа республикамыздың түкпір-түкпірінен жас спортшылар келіп, бақтарын сынады. Жарыстың жоғары деңгейде өтілуіне ат салысқан Шымкент қаласы мен Түркістан облысының дене шынықтыру және спорт басқармасы атсалысты. Тұңғыш рет ұйымдастырылған бәсекенің салтанатты ашылуында сөз алған Түркістан облысының дене шынықтыру және спорт басқармасының спорт бөлімінің басшысы Айтмахаметәлі Бердашев өңірімізде жас ұландарымыздың олимпиада бағдарламасына енген таеквандо спортына деген қызығушылықтары артқанын айта өтіп, жас саңлақтарға сәттілік тіледі. Сонымен қатар, турнирге арнайы келген таеквондо федерациясының Құрметті Президенті Шамсат Исабеков жарысқа қатысушы өрендерге сәттілік тіледі.
Ал, талантты шәкірттерімен танылған белгілі бапкер Шадияр Қондыбаев бұл жарыстың жастарға берер пайдасымен бөлісті.
Республикалық ашық турнирдің өтуіне Қазақстанның таеквондо федерациясы да үлестерін қосыпты. Еліміз бойынша бұл жекпе-жек сайысына 500-ден астам жас спортшылар қатысып, өзара мықтыны анықтады. Жарысты ұйымдастырушы Бектұр Өтебаев дарынды жас таеквондошылардың шеберліктерін шыңдайтын турнирдің маңыздылығына тоқталды.
Спорт сүйер қауым жақсы біледі,танымал бапкер Шадияр Қондыбаевтың қазір көптеген шәкірттері әлемдік аренада еліміздің намысын қорғап келеді.Өмірде көңіліне көп нәрсе түйген спорт маманы бүгінде Түркістан облысының №3 олимпиада резервін дайындайтын мамандандырылған балалар мен жасөспірімдер спорт мектебін басқарады. Спорттағы әріптестері де ұстаз-бапкердің абыройлы әрі ел спортының дамуына талай еңбек сіңіретінін айтады.
