Түркістан қаласындағы ХҚТУ-ның мәдениет залында белгілі спортшы, байырғы олимпиялық панкратионнан үш дүркін әлем чемпионы, Азияның абсолютты чемпионы Ардақ Назаровпен кездесу өтті.
Жастарды отансүйгіштікке шақырған мазмұнды жиынды Қазақстан Жазушылар одағы Түркістан облыстық филиалының төрағасы Айдар Сейдазым ашып, жүргізіп отырды.
Кездесуде ел бірлігі, ата-баба дәстүрі, қасиетті Ислам дінінің құндылықтары туралы әсерлі әңгіме өрбіді. Сондай-ақ егеменді елдің болашағы – жастардың тәрбиесі, имандылық, үлкенге құрмет, кішіге қызмет, жат ағым зардабы тақырыбында ой қозғап, бірқатар сұрақтарға жауап берілді.
– Жиынға келген жастардың қарасы аз болған жоқ. Ардақ бауырымыз жүйелі сөйлейді, асықпай-аптықпай сауатты әңгіме қылуды терең меңгерген. Кездесуде ұлттық код, намыс, иман, иба, сауат ашу, адамның өзін өзін тануы, тұлғалар тағылымы, тағдырлары, түйдек-түйдек өмір толғамдарын айтып отырып-ақ көрерменді ұйытып алды. Жадының мықтылығы шығар, шумақ-шумақ өлеңдерді жатқа айтады екен. Сонау пайғамбарымыз Мұхаммед ғалейссаламнан бастап, бергі жырауларымыз, би, бектеріміз, шешендеріміз, Төлеби, Бұқар, Абай, Мәшһүр Жүсіп, батыр Бауыржан аталарымыздың ғибратты сөздерін санаға сыналап сіңдіре білді. Жастарымыз бүгінде елең-алаң күй кешіп жүргені жасырын емес. Себебі, батыстың даңғаза музыкасы, биі, жаңа стилі, тик-тогы, ватцабы, фейсук, инстаграм секілді «тәрбие құралдарына» алтын уақыттарын сарп етуде. Атақты спортшы жастармен отбасы құндылығы және бірлік, ынтымақ тақырыбында ой бөлісті. Кіші буын өкілдерін жігерлендіретін, намысын қайрайтын сөздер айтып, оларды өз елінің патриоты болуға шақырды, – деді А. Сейдазым.
Кездесу-сұхбат барысында сауал-жауап форматы да қызықты өтті. Алаштың намысты азаматы жастарды спортпен жүйелі түрде шұғылданып, зор табысқа жетіп, еліміздің көк байрағын әлемдік аренада желбірете берулеріне тілектестік білдірді.
Шара соңында жастар атынан ізгі тілегін жеткізген Айдар Сейдазым спорт саңлағына алғысын айтып, ұлттың болашақ батырларын тәрбиелеу мақсатындағы ұстаздық жолына сәттілік тіледі.
