Қарағанды қаласында төрт жылда бір рет өтетін бұқаралық ақпарат қызметкерлері арасындағы дәстүрлі спартакиада аяқталды. Спорт додасына еліміздің бірнеше өңірінен сала мамандары қатысты.
Журналистердің Олимпиадасына баланатын бұл республикалық жарыста Түркістан облысы құрамасы жалпыкомандалық есепте бас жүлдені иеленді. Спорттың бес түрін қамтыған сайыста ақпарат құралдары өкілдері қазақ күресі мен шағын футбол, волейбол және үстел теннисі, бильярд спортынан республика бойынша іріктелген құрамалар бақтарын сынады.
Тартысты өткен спартакиадада көш бастаған түркістандықтар қоржынында 3 алтын, 3 күміс, 1 қола медаль бар. Ал, жалпыкомандалық екінші орынға Шымкент қаласының командасы қол жеткізді. Командалық үшінші орынға жергілікті Қарағанды құрамасы жайғасты.
Жеңіске деген құлшыныстары мықты Түркістан облысының журналистер командасы жарысқа қатысуға барлық жағдай жасап, қолдау көрсеткен Түркістан облысының дене шынықтыру және спорт басқармасының басшысы Қанат Жолдықараевқа және Қазақстанның Журналистер одағы Түркістан облыстық филиалының төрағасы Ғалымжан Елшібайға
өздерінің алғыстарын білдіреді. Ал, республикалық бұл жарысты ұйымдастырған Қарағанды облысы әкімдігі мен облыстық спорт басқармасы ұжымы болатын.
Жеңімпаздар мен жүлдегерлер арнайы тағайындалған кубоктармен және дипломдармен марапатталды. Қоғамдық өмірімізде қалам тартып, еліміздің дамуына мол үлестерін қосып келе жатқан әріптестеріміз татулық пен достастықты дәріптеп, тамаша көңіл күймен тарқасты.
«Түркістан» қалалық газетінің бас редакторы Мәлік Дәулетов аталған спартакаиадаға түркістандық БАҚ өкілдерінің белсене қатысқанын айтады.
– «Түркістан» қалалық газеті ұйытқы болып «Тұран БАҚ» командасын құрып, Түркістан облысындағы БАҚ өкілдері арасында спартакиадада командалық есепте 4-орын алып едік. Енді Қарағандыда өтіп жатқан БАҚ өкілдері арасындағы республикалық спартакиадада «Тұран БАҚ» командасының өкілдері облыс құрамасының қоржынына 2 алтын салды. Күміс пен қоланы айтпағанда. Қазақстанның Журналистер одағы Түркістан облыстық филиалының төрағасы Ғалымжан Елшібай ағамыз бата беріп, жіберген облыстық құрама командасының ішінде «Тұран БАҚ-тың» өкілдері 2 алтын, 1 күміс, 1 қола медалға қол жеткізіп, облыстық құраманың қоржынына олжа салды. Бұл біз үшін яғни, Түркістан облысы және «Тұран БАҚ» командасы үшін үлкен қуаныш. Бой көтеріп, еңсе тіктегеніне небәрі төрт жыл болған Түркістан облысының БАҚ өкілдері әріптестер арасындағы төрт жылда бір өтетін республика көлеміндегі спорттық бәсекеде көш бастап, кеуделерінде алтын медальдарын жарқыратып туған жерге оралды. Облыс басшылығы бастап, спортшы журналистердің ағалары боп біз қостап, жеңімпаздарды үлкен қуанышпен қарсы алдық. Түркістан облысының БАҚ өкілдерінен құралған жас командасы үшін бұл үлкен қуаныш. Тіпті Түркістан облысының құрылғанына төрт жыл толуына орай, төрт жылда бір өтетін жарыстан жеңімпаз атанған журналистер өз жеңістерімен тарихи мекенге сый жасады десек те болатындай. Облыс журналистерінің осы қуанышты күнге жетуіне елеулі үлес қосқан біздің «ТҰРАН БАҚ» командасының өкілдеріне, барша әріптестерді жеңісімен құттықтаймын! Сонымен бірге, Қарағанды қаласында өткен БАҚ өкілдері арасындағы республикалық спартакиадаға өңіріміздегі журналист спортшылардың барып, қайтуына барлық жағдайды жасап, қолдау көрсеткен облыстық дене шынықтыру және спорт басқармасы, қоғамдық даму басқармасы және ҚР Журналистер одағы Түркістан облыстық филиалына үлкен алғыс білдіреміз! – деді ол.
