Таяуда Түркістан қаласы маңындағы Шаға елдімекенінде жаңа жағажайдың ресми ашылу салтанаты өтті. Тарихи шаһардағы туристік-рекреациялық орталығының ашылу салтанатына Түркістан облысының аудан, қалалары мен Шымкент қаласынан және өзге де шаһарлардан саяхатшылар келді. Түркістан облысының әкімі Өмірзақ Шөкеев «Шаға» жағажайын аралап көріп, жұмысына сәттілік тілеген болатын.
Осы орайда, Жаңа демалыс орнының пайда болуына байланысты арнайы қоғамдық көлік қатынайтын болады. Ол «Түркістан-Шаға» ауданаралық бағытының кестесіне енгізіліп отыр.
Алғашқы рейс Түркістан қаласындағы «Қуаныш» базары маңынан сағат 10:00-де шығып, 11:20-да жағажайдан шығып кетеді. Екінші рейс «Қуаныш» базары маңынан сағат 16:00-де шығып, 17:20-да Түркістан қаласына қайтады. Алдағы уақытта да аталған бағыттағы қоғамдық көлік ұдайы қатынайтын болады.
Тасымалдаушы мекеме – «Жолаушы» ЖШС. Жол ақысы – 150 теңге. Байланыс телефондары: +7(776)-322-08-68, +7(777)-380-98-93.
Айта кетейік, демалыс аумағының құрылысы 2020 жылы қараша айында басталды. Жалпы ауданы – 81 гектар. Ал суының сыйымдылығы – 2,5 млн. текше метрге жуық. Қазіргі таңда жасанды су айдынында 2 млн. текше метр су бар. Көктемгі суды қабылдайтын, су жіберетін каналдар да дайын. Жағажайда емдік қасиетке ие шағыл құм төселіп, ағаш отырғызылған. Жаңа туристік нысанға баратын жолдың сапасы да жоғары деңгейде. Алдағы уақытта балалар демалыс аумағы, элиталық коттедждер мен қонақүйлер, аквапарк салынады деп жоспарланып отыр.
