Бұл туралы облыс әкімі Нұралхан Көшеров «Достық үйі» ғимаратында «Бірлік бастауы – берекелі Түркістан» тақырыбында өткен Түркістан облыстық Қазақстан халқы Ассамблеясының XXVIІ сессиясында айтты.
– Мемлекет басшысы Қасым-Жомарт Кемелұлы Тоқаев Қазақстан халқы Ассамблеясының ХХХІV сессиясында еліміздің рухани және тарихи-мәдени ордасы – Түркістанда ашылған жаңа «Достық үйін» үлгі етті. Осындай «Достық үйлерін» еліміздегі бірнеше қала мен аудандарда ашуды тапсырды. Оның ішінде өзіміздің Сайрам ауданы да бар. Облысымыздағы этнос өкілдері тығыз шоғырланған Сарыағаш ауданынан да «Достық үйін» ашу керек деп санаймын. Аталған аудан әкімдіктеріне осы тапсырмаға сәйкес қысқа мерзім ішінде нақты ұсыныс енгізуді тапсырамын, – деді облыс әкімі.
Сондай-ақ облыс әкімі этнос өкілдерінің аймақты дамытуда атқарып жатқан жұмыстарына тоқталды.
– Ассамблеяның 30 жылдығы – егемен еліміздің тарихындағы айтулы оқиға. Аталған институт этносаралық келісім мен жалпыұлттық бірлікті нығайту жолында тиімді саясат жүргізе алатын ұйым ретінде танылды. Соңғы жылдары Түркістан облысында медиация саласы айтарлықтай көрсеткіштерге жеткенін айта кеткен жөн. Былтыр Ассамблея сессиясында Президентіміз облысымыздағы этномедиацияға қатысты жұмыстарға оң баға берді. Биыл Ассамблеяның 30 жылдығы аясында өңірімізде 2 мыңнан аса ұлттық, мәдени, спорттық іс-шаралар өткізілуде. «Ассамблея жастары» да азаматтық жауапкершілікті дамытуға арналған бірқатар бағдарламалар мен жобаларды жүзеге асыруда. Облысымыздағы этнос өкілдері тығыз шоғырланған аудандардан «Достық үйін» ашу керек деп санаймын. Түркістан облысында этносаралық келісім тұрақты дамып, барлық азаматтардың мүдделері тең дәрежеде қорғалады. Сіздермен бірге еліміздің өркендеуіне, бірлігі мен ынтымағына үлес қосу – үлкен мәртебе, – деді аймақ басшысы.
Алқалы басқосуда Түркістан қалалық өзбек этномәдени бірлестігінің төрағасы Раимжан Қошқаров, Түркістан облыстық түрік этномәдени бірлестігінің мүшесі Зикирулла Юсупов, Түркістан облыстық тәжік этномәдени бірлестігі Жетісай аудандық филиалының төрағасы Халим Тұрсынов, Түркістан облыстық Қазақстан халқы Ассамблеясы жанындағы Журналистер мен блогерлер клубының төрағасы Ерсұлтан Әмірбек облыс көлемінде жүзеге асып жатқан қайырымдылық шаралары, мемлекеттік тілдің қолдану аясын кеңейту, жалпы ахуал, медиацияның дамуы жайында мазмұнды баяндама жасады. 
Түркістан облыстық Қазақстан халқы Ассамблеясы еліміздегі этносаралық татулық пен тұрақтылықты сақтау жолында ауқымды жұмыстар атқарып келеді. Атап айқанда, облыста «Салауатты сана», «Адал азамат», «Елтану», «Мың бала», «Қайырымдылық керуені», «Жаңа толқын», «Шаңырақ» жобалары сәтті жүзеге асырылып жатыр. Жыл басынан бері 631 іс-шара мен 49 қайырымдылық акциясы өткізіліп, 39 мыңға жуық адам қамтылды. Сонымен қатар 168 ақпараттық-насихаттық кездесу өткізіліп, оған 9000-ға жуық тұрғын қатысты.
Сәбит ТАСТАНБЕК,
арнайы Аptamedia.kz ақпарат агенттігі үшін.
