Бүгін Түркістан облысы Түлкібас ауданында «Жаңа форматтағы кітапханалар. Жаңашыл кітапханашылар» атты Түркістан облыстық кітапханашылар Слеті өтті.
Тұңғыш рет өткен шараны Облыстық «Farab» әмбебап ғылыми кітапханасы ұйымдастырған. Алдымен қатысушы кітапханашылар «Ақсу-Жабағылы» мемлекеттік табиғи қорық музейіне барды. Содан соң ашық аспан астында Жабағылы ауылдық кітапханасының жұмысымен және арнайы әзірленген кітап көрмесімен танысты. Түлкібас аудандық ОКЖ, Жабағылы ауылдық кітапханасындағы негізгі шараны Түркістан облыстық мәдениет басқармасының тарихи-мәдени құндылықтарды қорғау бөлімінің маманы Нұрдәулет Сұлтанбек пен Түлкібас аудандық мәдениет, тілдерді дамыту, дене шынықтыру және спорт бөлімінің басшысы Мақұлбек Аманов ашып беріп, құттықтау сөз сөйледі. Сондай-ақ бұл Слеттің маңызына тоқталып өтті.
Облыстық кітапхана басшысы Жанат Шардарбекова аталмыш шараға модератор болып, жалпы Түркістан облысындағы кітапханалар туралы, сонымен қатар ондағы күрделі мәселелер мен даму жағдайы туралы сөз сөйледі. Мұнан соң «Түлкібас аудандық кітапханалар жұмысы: жағдайы мен жетістіктері», «Түркістан облысы кітапханаларының 2019-2022 жылдардағы жағдайы: аналитика», «Қолжазба – ғасырлар руханияты», «Балалар оқуы: дамыту және қолдау», «Кітапханашылар Сіздер үшін!», «Тың жобалар топтамасы», «Кітапханашы кәсібім, салт-дәстүрім асылым», «Jastar synegry» жобасы, «Кітапхана қызметкерлерінің дамуы үшін іскер ойындардың пайдасы: тренинг сабақ» тақырыбындағы баяндамалар тыңдалып, дәрістер өтті. Келелі мәселелер қозғалып, ұсыныстар берілді. Жаңа жобалар мен тың идеялар жарияланып, ауыл кітапханаларының жұмысы іс-тәжірибе ретінде паш етілді.
Шара соңында Облыстық кітапхана басшысы Жанат Шардарбекова облыстағы ардагер кітапханашыларды Қазақстанның Кітапханашылар ассоциациясы атынан «Қазақстанның құрметті кітапханашысы» төсбелгісімен марапаттап, шараға қатысушы кітапханашылар жұмысына сәттілік тіледі. Осы іс-шараны қорытындылай келе жыл сайын облысымыздың әр ауданында кітапханашылар бас қосатын болып тарқасты.
