Жасанды интеллект өзегі – тіл, сондықтан ауқымды тіл моделін жасау – мемлекеттің кезек күттірмейтін қажеттілігі. Бұл орайда, еліміздегі Ш.Шаяхметов атындағы «Тіл-Қазына» ұлттық ғылыми-практикалық орталығының жұмысында оң нәтиже бар.
Осы күнге дейін 170 мыңға жуық қолданушы «Тіл құрал» (5 деңгейлі жүйе) мен «Бала тілі» (9 жасқа дейінгі балаларға арналған) секілді тілдік онлайн платформалар арқылы оқыған. 400 мыңға жуық термин топтастырылған «Termincom.kz» платформасы да таныстырылды. Аталған портал терминдерді жүйелеу базасы міндетін атқарады. Бұл жұмысқа тиісті салалық мамандар тартылған.
Алдағы уақытта заң саласындағы терминдерді реттеу жұмысы күтіп тұр. Басты мақсат – нормативтік-құқықтық актілерді әзірлеуге, іс қағаздарын жүргізуге қажет терминдерді біріздендіру.
Осы жылы «Тіл-Қазына» ұлттық ғылыми-практикалық орталығы жасанды интеллект саласында бірнеше жоба ұсынбақ. Соның бірі – «Qazgramma» платформасы, ол жазылған мәтіннің дұрыстығын тексеруге мүмкіндік береді. Жоба әлемдік нарықта танылған Grammarly сервисінің баламасы ретінде ұсынылып отыр.
Орталық қолжетімді халықаралық ауқымды тіл модельдерін (LLM) қазақ тіліне бейімдеу жұмысын жүзеге асыруға дайын екенін білдірді. Нәтижесін ашық кодтар арқылы отандық компаниялар мен мемлекеттік органдарға тегін ұсынып, өз қажеттіліктеріне сай пайдалануына жол ашпақ. Орталық директоры Мақпал Жұмабай жасанды интеллектіні автоматты түрде оқыту үшін мемлекеттік деңгейдегі деректер қоры қажеттігін айтады.
Рас, қазір – цифрландыру дәуірі. Алдымызда тұрған мақсат – тілімізді цифрлық кеңістікте өркендету. Жасанды интеллектіні барлық салаға енгізу арқылы ел дамуына жол ашамыз. Осы ретте, қазақ тілі емтиханын халықаралық стандарттау, тілді меңгеру деңгейін сертификаттау жүйесі, оқытушылар біліктілігін арттыру, әдістемелік құралдарды жетілдіру және т.б. мәселелер жүйелі іске аспақ.
