Елдегі саяси науқан өз мәресіне жетті. Түркістан облысының тұрғындары бұл сайлауда да белсенділік танытты. Өңір тұрғындарының 80 пайыздан астамы дауыс беріп, Республикада үштіктен көрінді. Бұл тұста да облыс тұрғындарының елдің болашағына бей-жай қарамайтындығын көрдік. Жарқын болашақ жолында өз көшбасшыларын таңдағанына куә болдық.
Орталық сайлау комиссиясының алдын ала қорытындысы бойынша Халықтық коалиция атынан Президенттікке кандидат Қасым-Жомарт Тоқаев 81,31% дауыс жинап, жеңіске жетті. Бір ай бойы жұмыстарды жүйелі жүргізудің нәтижесінде сайлаушылардың науқанға қатысуға деген қызығушылығын ояттық деп сеніммен айта аламыз. Халық «Әділетті Қазақстан» және «Қуатты Қазақстан» ұстанымдарын қолдады деуге толық негіз бар.
Кеше Қ.К.Тоқаев Республикалық қоғамдық штабқа Exit poll-дың қорытындысымен танысуға келіп, өзіне сенім артқан коалиция мүшелеріне алғысын білдірген болатын. Ол үміткерлерге бірдей мүмкіндік берілгенін атап өтті. Сондай-ақ Президент сайлауы жаңа саяси дәуірге жол ашатынын айтып, алдағы уақытта басты билік институттары түгел жаңғыртылатынын жеткізді.
– Бұл науқан біздің тарихымызда қалатыны сөзсіз. Қоғамдық штабқа, сенімді өкілдеріме, еріктілерге рахмет айтамын. Сіздер еліміздің әр түкпіріне бардыңыздар. Ауыл-аймақтар, шалғай елді мекендер назардан тыс қалған жоқ. Ел арасында үгіт-насихат жүргіздіңіздер. Бұл – үлкен жұмыс. Оны мен ешқашан ұмытпаймын. Сол себепті бүгінгі көрсеткіш – бәрімізге ортақ жеңіс. Әрбір сайлаушыға өз таңдауын жасауына еркіндік берілді. Сондықтан бұл науқан ерекше әділ, ашық өтті. Халықтың сенімі – бұл ең құнды нәрсе. Сондықтан халықтың сенімін бәріміз ақтауымыз керек, – деді Қасым-Жомарт Кемелұлы.
Жалпы бұл саяси науқан Түркістан облысы тұрғындарының ұйымшыл екендігін тағы да дәлелдеді. Өңірімізде дауыс беру процессі ерекше форматта өткені көпшіліктің назарын аудартты. Мәселен, Төлеби ауданында сайлауға әжесімен бірге келген 3 жасар Қасым-Жомарт сайлау учаскесі төрағасынан арнайы сыйлық алды. Бұл бүлдіршін 2019 жылы Президент Қасым-Жомарт Кемелұлы Тоқаев ел басқаруға келген күні дүниеге келген екен. Сайрам ауданындағы Жаңатұрмыс ауылында тұратын 102 жастағы қария Наим Шараванов та өз сайлау учаскесіне барып, таңдау жасады. Ал, Сарыағаш ауданында шаңырақ көтерген жас жұбайлар Зайдин Жақсылық пен Сайлау Жанару өмірлеріндегі ерекше сәт енді сайлауға қатысуымен толыққанын жеткізді. Дауыс беру күні 18 жасқа толған жастар да келешегіне алаңдайтынын білдіртті.
Сондай-ақ, орталық алаңдарда азық-түлік жәрмеңкесі ұйымдастырылды. Онда күнделікті тұтыну тауарлары мен азық түліктер нарықтан 10-15 пайызға арзан бағада сатылымға шықты. Пробация қызметінде тұрушылар мен қатар ауруханадағы емделушілерде саяси науқаннан тыс қалған жоқ. Үйден дауыс беретін азаматтарға да қолайлы жағдай жасалды. Ал, перзентханадағы жас аналар сайлауға 100% қатысты.
Алдағы уақытта да елдік істерде бір жағадан бас, бір жеңнен қол шығарып, үлгі боларлық істердің басы-қасынан көрінейік. Ынтымағымыз бен берекелі бірлігіміз жоғалмасын!
ӘДІЛДІК: ҚАЗІР ЖӘНЕ ӘРДАЙЫМ. Қуатты да, Әділетті Қазақстанды бірге құрамыз!
Бейсен ТӘЖІБАЕВ,
«AMANAT» партиясы Түркістан облыстық филиалының Атқарушы хатшысы, Фракция жетекшісі, облыстық мәслихат депутаты
