Бүгінгі таңда Түркістан қаласында цифрлық трансформация мен заманауи технологияларды енгізу бағытында ауқымды жұмыстар қолға алынып келеді. Түркістан облысында цифрландыру саласы соңғы жылдары қарқынды дамып, әлеуметтік, білім беру, әкімшілік және инфрақұрылым бағыттарында ауқымды жобалар сәтті жүзеге асырылуда. Өңір республика бойынша цифрлық трансформацияның үздік үлгісіне айналып келеді. 2024 жылдың соңына қарай Түркістан облысындағы 829 ауыл елдімекенінің 690-ында 3G/4G мобильді интернет желісі іске қосылып, тұрғындардың 92,2 пайызы сапалы байланыспен қамтылды. Интернетпен қамтылмаған 39 ауылды желіге қосу 2027 жылға дейін толық аяқталады деп жоспарлануда.
Сонымен қатар, облыс орталықтары мен ірі елдімекендерде байланыс сапасын жақсарту мақсатында 14 жаңа базалық станция орнатылды. Түркістан, Сарыағаш және Жетісай қалаларында 5G желісі енгізіліп, заманауи технологиялар стратегиялық нысандарда қолжетімді болды. Облыстағы 911 мектептің барлығы интернет желісіне қосылып, 330 мектепке Starlink құрылғылары орнатылды. Мектеп асханаларында «Әлеуметтік әмиян» жобасы енгізіліп, оқушылардың тамақтануын электронды жүйе арқылы бақылауға мүмкіндік жасалды.
