Бүгінде еліміз цифрландыру саласында айтарлықтай жетістіктерге қол жеткізіп отыр. 193 мемлекет арасында Қазақстан 24-орында, сондай-ақ онлайн-қызметтер индексінде 10 көшбасшының қатарына кіреді. Мысалы, интернет арқылы мемлекеттік қызметтерге қол жеткізу 92%-ға жетті.
Жалпы, елімізде биометриялық сәйкестендіру және QR-қолтаңба қызметтері енгізіліп жатыр, бұл электрондық қызметтерді алу үдерісін едәуір жеңілдеткен. 2024 жылы QR-кодтардың көмегімен 8 млн-нан астам қол қойылды, ал Digital ID жүйесі арқылы 18 млн-нан астам сәйкестендіру жүргізілді.
«Электрондық үкімет» платформасын жетілдіру және жаңғырту үдерісі үздіксіз жүргізіліп жатыр және үшінші нұсқаға көшудің белсенді кезеңінде. Жаңа eGov ЖИ технологияларын қолдану арқылы айтарлықтай тұрақты әрі ыңғайлы болады.
Таяуда Үкімет отырысының қорытындысы бойынша цифрлық даму, инновациялар және аэроғарыш өнеркәсібі министрі Жаслан Мәдиев, денсаулық сақтау вице-министрі Ербол Оспанов, еңбек және халықты әлеуметтік қорғау вице-министрі Олжас Анафин, қаржы вице-министрі Әсет Тұрысовтың қатысуымен баспасөз конференциясы өткен болатын.
Сол жиында Жаслан Мәдиев күнделікті қызметке жаңа цифрлық технологиялар мен жасанды интеллектіні енгізу бойынша жүргізіліп жатқан жұмыстар туралы айтып берді. Министр жасанды интеллектіні қолдануда шек жоқ екенін атап өтті. Қазақстанда цифрлық технологиялар бүгінде өнеркәсіп, экология, денсаулық сақтау, білім беру, жұмысқа орналастыру, әлеуметтік және заңгерлік қолдау, салық секторы және бизнес-орта салаларында енгізіліп, белсенді пайдаланылуда. Бұл жұмыс экономиканың түрлі секторларында жүргізілетін болады. Ұлттық жасанды интеллект платформасы іске қосылды. Мемлекеттік органдардың 100-ге жуық қызметкері жасанды интеллект құралдарына оқытылды.
Сондай-ақ ол ведомство жасанды интеллект саласындағы мамандарды ғана емес, мектеп оқушыларын да оқытуға бағытталған бірқатар білім беру бастамаларын әзірлеп жатқанын хабарлады.
Олжас Анафин 2025 жылғы 1 қаңтардан бастап жыл сайынғы ортақ зейнетақыны 8,5%-ға индекстеу жүзеге асырылатынын атап өтті. Оның айтуынша, бүгінгі таңда ведомство жұмысында цифрлық технологиялар белсенді қолданылады және көптеген төлемдерді онлайн рәсімдеуге болады.
Әсет Тұрысов ведомство бюджеттік көрсеткіштерді болжау, тәуекелдерді басқару және артық шығындар немесе орындамау сияқты бюджеттегі ауытқулардың алдын алу үшін ЖИ пайдалану мәселесін зерттеп жатқанын хабарлады.
Ербол Оспанов денсаулық сақтаудағы цифрландыру медициналық қызметтердің қолжетімділігі мен қызмет көрсету сапасын жақсартатынына тоқталды. Ол биыл дәрі-дәрмектің жолын – медициналық мекемеге жеткізуден бастап оны жүзеге асыруға және пациентке ұсынуға дейін бақылауға мүмкіндік беретін цифрлық рецепттер енгізілгенін айтты.
Еске сала кетсек, 2024 жылы еліміз IT-саласы қарқынды өсімді көрсетті. IT-компаниялардың саны 18 683-ке жетті. Соңғы үш жылда 16% өсім. Мәселен, елімізде «Astana Hub» халықаралық технология паркі жұмыс істейді. Бүгінде ол Қазақстандағы IT-стартаптарды дамыту орталығы ретіндегі рөлін айқындады. Технопарк 1,5 мыңнан астам қатысушыны біріктірді. Олардың ішінде 1102 отандық және 437 шетелдік компания бар. Қатысушылардың жалпы табысы 1,2 трлн теңгені құрады. Өсім соңғы бес жылда 31 есе артты. 2024 жылы экспорттық түсім 140 млрд теңгеден асты. Төрт жылдағы жылдық өсім де 10 еседен астам. Осылайша, «Astana Hub» өңірдегі жетекші технопарк ретінде өз позициясын нығайтуда.
