Бұл жаңалық Бас прокурордың Мәжіліс депутаттары сауалына берген жауабында айтылған еді. Нақтырақ айтсақ, «Тəуекел тобындағы» отбасылармен мақсатты жұмыс істеу үшін Құқықтық статистика деректері «Отбасының цифрлық картасымен» (Еңбек жəне халықты əлеуметтік қорғау министрлігі) біріктірілетін болады. Оның аясында уəкілетті органдар тарапынан бақылау-қадағалау функцияларын автоматтандыру жолымен балалар арасындағы құқық бұзушылықтардың алдын алу мəселелерін күшейтуге бағытталған ақпараттық жүйе енгізілмек. Жалпы, соңғы жеті жылда қабылданған іс-шаралармен кəмелетке толмағандарға қатысты қылмыстардың 3 820-дан (2015 жылы) 1 460-қа дейін (2023 жылы) 61,8 пайызға, оның ішінде олардың жыныстық тиіспеушілігіне қарсы 52,3 пайызға (1 259-дан 600-ге дейін) дейін төмендеуі байқалған екен.
Атап өтсек, 2023 жылдың соңындағы деректерге сәйкес, цифрлық картаға шамамен 6 млн отбасының, олардың жанұя мүшелерімен қосқанда 19 млн адамның мәліметтер енгізілген. Деректер отбасы мен оның мүшелерінің мәртебесі өзгерген сайын жаңарып отырады. Мемлекеттік қолдау шараларын алуға рұқсат берілген кезде оған СМС-хабарлама жіберіледі. Кейін әлеуметтік жәрдемақы, төлемдер немесе мемлекеттік қолдаудың өзге де түрлерін тағайындау жүзеге асырылады. Тиісінше, ол қаражат азаматтың банк шотына аударылады.
Жалпы елімізде «Цифрлы Қазақстан» және «Еуразиялық одақтың негізгі бағыттарын 2025 жылға дейін цифрландыру» мемлекеттік бағдарламалары қабылданған болатын. Оның «Цифрлық Жібек жолын іске асыру», «Адами капиталды дамыту», «Инновациялық экожүйені құру» сияқты бағыттары бар. Мұндағы басты мақсат – мемлекеттің экономикалық дамуын жеделдету және цифрлы технологиялар есебінен халықтың өмірін жақсарту, цифрлы экономиканы құруға жағдай жасау.
Мемлекет басшысы Әр министрлікте өз саласына цифрлық өзгеріс жасау картасы (Сингапур тәжірибесі бойынша) болуы қажеттігін атап өтті.
Экономиканы цифландырудың екі жағы бар: бір жағынан, бұл өндіріс құрылымында және жалпы экономикада қоғамдағы сапалы өзгерістер түріндегі ықтимал тәуекелдерді тудырады, шығындарды азайту үшін тиімді шаралар қабылдауды талап етеді. Екінші жағынан цифрландыру үдерісі прогрессивті мүмкіндіктерге негізделген тәуекелдерді азайту тетіктерін ұсынады. Сондай-ақ жаңа жұмыс орындарын құруға ғана емес, сандық технологияларды қолдануға негізделген әлеуметтік мінез-құлықтың жаңа нормаларының қалыптасуына ықпал етеді.
