Мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты Қазақстан халқына Жолдауында туризм серпінді жобалар қатарында болуға тиіс екендігін баса айтты.
Президент атап өткендей, туристерге арналған тартымды жобаларды жүзеге асыру – басты мақсаттың бірі. Бұл орайда, Түркістанда бой көтеріп жатқан «Қылует» рухани орталығының іші ерекше үлгіде жасалмақ. 500 орынды заманауи мешіттен және медреседен тұратын «Қылуеттің» ішкі дизайны да ерекше болмақ. Теңдесі жоқ бірегей жобаның құрылыс сапасы – басты назарда. Нысанның бірінші кезеңі аяқталған. Сәулеті мен маңызы ерекше нысанның құрылысы бойынша Түркістан облысының әкімі Дархан Сатыбалды жауапты сала басшыларына нақты тапсырмалар берді.
Жерасты мешітінің ішкі инфрақұрылымы тартылған. Қасбеті ақ мәрмәрмен қапталады. Бүгінде ішкі және сыртқы әрлеу жұмыстарына күш салынған. Оның сәулеттік келбеті мен безендірілуі негізгі классикалық қалыпты сақтай отырып, ерекше жаңа стилде жасалған. Мешітке қазақтың бай ою-өрнектері қолданылған.
Басқосуда 4 мың шаршы метрден асатын мешіт аумағын абаттандыру жұмыстары талқыланды. Мешіттің құрылысы бойынша дін өкілдерінің ұсыныс-пікірлері ескерілуде.
Айта кетейік, бұл орталық толығымен демеушілердің қаржысымен тұрғызылуда. Жалпы мешіттің құрылысына еліміз бен түркі әлеміне танымал кәсіпкерлер демеушілік жасап отыр. Діни ғимарат 1 гектарға жуық аумақта орналасқан. Рухани орталықтың көлемі 3 мың шаршы метрге жуық. Жерасты мешітінің қасынан қарилар мен болашақ дін ғұламаларын даярлайтын медресе орналасқан.
