Біріккен Ұлттар ұйымының шешімімен 11-ақпан күні Ғылымдағы әйелдер мен қыз балалардың халықаралық күні болып жарияланған. Бұл қадам әйелдер мен қыз балалардың ғылымға толық және тең қол жеткізуіне және олардың құқықтары мен мүмкіндіктерін қамтамасыз етуге, сонымен қатар, ғалым әйелдерге демеу көрсетуге, олардың ғылым мен техника салаларындағы ғылыми-зерттеу қызметіне қатысуын қолдауға бағытталған.
Бүгін атаулы күнге орай Қ.А.Ясауи атындағы қазақ-түрік университетінде өткізілген іс-шара «AMANAT» партиясы Түркістан облыстық филиалының Әйелдер қанатының белсенді үлесімен ұйымдастырылды. «Ғылымдағы әйелдердің болашағын құру» тақырыбындағы дискуссиялық алаңға ҚР Президенті жанындағы Мемлекеттік басқару академиясының өкілдері, өңірдегі «Әйелдер қанатының» 10 бағыт бойынша белгіленген жетекшілері мен профессорлар құрамы, ғылыми қызметкерлер мен докторанттар, жас ғалымдар қатысты.
Отырысты ашып, жүргізіп отырған Қ.А.Ясауи атындағы Халықаралық қазақ-түрік университетінің ректоры, облыстық мәслихаттың депутаты, партия филиалының Әйелдер қанатының «Ғылымдағы әйелдерді қолдау» бағытының жетекшісі Жанар Темірбекова ғылымға бет бұрған қыз-келіншектерді атаулы күнмен құттықтап, Мемлекет басшысы Қасым-Жомарт Тоқаевтың бұл бағыттың маңыздылығына ерекше мән беріп отырғанын атап өтті. «Соңғы жылдары әйелдер қауымы ғылым мен техника саласындағы ғылыми-зерттеу жұмыстарына, БҰҰ-ның Тұрақты даму мақсаттарын жүзеге асыруға белсене қатысып, нәтижелі жұмыс атқарып келеді. Ахмет Ясауи университетінде әйелдер мен қыз балалардың ғылымға толық әрі тең қол жеткізуіне және олардың тең құқықтары мен мүмкіндіктерін қамтамасыз етуге мүмкіндіктер жасалған. Жалпы 2024 жылы университетімізде 36 жоба жүргізілсе, оның ішінде 12 жобаны әйел ғалымдарымыз өте жоғары деңгейде жүзеге асырды. 295 магистрантымыздың 202-сі, 89 докторанттың 52-сін әйелдер қауымынан шыққан жас ғалым құрайды»»,-деп атап өткен Жанар Амангелдіқызы дискуссиялық алаңда түрлі тақырыптар бойынша талқылаулар өтетінін жеткізді.
Сөз алған «AMANAT» партиясы Түркістан облыстық филиалы атқарушы хатшының орынбасары, өңірлік партия филиалы жанындағы «Әйелдер қанатының» әйелдердің саяси көшбасшылығын қолдау бағытының жетекшісі, облыстық мәслихат депутаты Қалыйма Жантөреева қоғамда әйел затының орны бөлек екенін атап өтіп, осыдан бір жыл бұрын, партияның «Әйелдер қанаты» құрылғанын жеткізді. Өңірдегі «Әйелдер қанаты» әйелдердің қоғамдағы саяси мәселелерде көшбасшылық етуі, олардың қоғамдағы рөлін арттыру мен барлық мәселелерге белсене араласуы бойынша түрлі бағытта жұмыс істелініп жатқаны баяндалды. «Әйелдердің саяси белсенділін, олардың бастамашылдығын арттыруға бағытталған «Әйелдер қанатының» 10 бағытының бірі – «Ғылымдағы әйелдерді қолдау». Біз әрбір әйел-ананың бастамасын қолдап, қоғамдағы рөлін арттыруға, жұмысын одан әрі жандандыруына қолдау білдіреміз»,-деді Қалыйма Жантөреқызы.
Жиында «Шыны төбе» сенімдері: Жоғары білімде қазақ әйелдері, Қазақстандағы ғылымды дамыту, Әлеуметтік-гуманитарлық ғылымдарда әйелдердің рөлі, Денсаулық сақтау және жаратылыстану ғылымдарындағы әйел ғалымдар, Мемлекеттік қызметшілердің біліктілігін арттыру мүмкіндіктері тақырыптарында баяндамалар оқылды. Алаңдағы маңызды мәселелерді көтерген нәзік жандылар қатарында ҚР Президенті жанындағы Мемлекеттік басқару академиясының Алматы облысы бойынша филиалының директоры Айнұр Идрисова, Халықаралық туризм және меймандостық университеті, Туризм кафедрасының доценті Мадина Абдикаримова және Қ.А.Ясауи университетінің ғалымдары Лазура Қазыханқызы, Зиеда Халматова бар.
Дискуссиялық алаң аясында жиналғандар баяндама оқылған тақырыптар төңірегінде бір-бірімен пікір алмасып, ұсыныстарын ортаға салды. Ғылымды дамыту, инновациялар мен зерттеулерде әйелдердің үлесін арттыру жайы да талқыланды.
«AMANAT» партиясы Түркістан облыстық филиалының баспасөз қызметі
