Сауран ауданы делегациясының Өзбекстан Республикасына жасаған екі күндік жұмыс сапары өзара тиімді серіктестікті нығайту және жаңа инвестициялық жобаларды іске асыру бағытында маңызды нәтижелермен аяқталды. Іссапар барысында өндіріс, ауыл шаруашылығы, қайта өңдеу өнеркәсібі және кәсіпкерлік салаларындағы ынтымақтастық мәселелері жан-жақты талқыланып, бірлескен жобаларды жүзеге асыру бойынша нақты келіссөздер жүргізілді.
Жұмыс сапарының қорытындысы Сауран ауданында экономиканы дамытуға, өндіріс көлемін ұлғайтуға, инвестиция тартуға және экономиканы әртараптандыруға тың серпін береді. Бүгінде аудан экономикасының тұрақты дамуы жаңа өндірістерді іске қосумен, заманауи технологияларды енгізумен және халықаралық іскерлік байланыстарды кеңейтумен тікелей байланысты. Осы тұрғыдан алғанда көршілес Өзбекстанмен өндірістік және инвестициялық ынтымақтастықты күшейту – өңірдің экономикалық әлеуетін арттырудағы маңызды қадамдардың бірі.
Кездесулер барысында көкжидек пен гортензия көшеттерін жеткізу, сыйымдылығы 500 тонналық тоңазытқыш кешенін орнату, қан өңдеу жабдықтарын сатып алу, 120 басқа арналған мал сою алаңының құрал-жабдықтарын жеткізу, агрохимиялық тыңайтқыштар өндіру, кондитерлік өнімдер шығару және жиһаз өндірісін дамыту бағытындағы жобаларды жүзеге асыру мүмкіндіктері қарастырылды. Бұл бастамалардың барлығы Сауран ауданында өндірістік инфрақұрылымды нығайтып, қосылған құны жоғары өнім өндіруге жол ашады.
Ауыл шаруашылығы саласындағы жобалардың да маңызы ерекше. Жоғары сұранысқа ие көкжидек пен гортензия көшеттерін өсіру арқылы ауданның аграрлық әлеуеті кеңейіп, ауыл шаруашылығы өнімдерінің түрлері көбейеді. Алғашқы кезеңде гортензияның 300 түп көшетін отырғызу жоспарланып отыр. Бұл жоба сәндік өсімдіктер өндірісін дамытып қана қоймай, көгалдандыру және ландшафтық дизайн саласына қажетті өнімдерді жергілікті жерде өндіруге мүмкіндік береді.
Сыйымдылығы 500 тонналық тоңазытқыш кешенінің салынуы ауыл шаруашылығы өнімдерін ұзақ мерзім сақтауға, олардың сапасын жоғалтпай нарыққа шығаруға және маусымаралық кезеңде өнім бағасының тұрақтылығын қамтамасыз етуге ықпал етеді. Сонымен қатар қайта өңдеу кәсіпорындарының тұрақты шикізат қорын қалыптастыруға жағдай жасайды.
Қан өңдеу жабдықтары мен мал сою алаңына арналған жаңа технологияларды енгізу ветеринариялық қауіпсіздікті күшейтіп, өнім сапасын халықаралық талаптарға сәйкестендіруге мүмкіндік береді. Бұл өз кезегінде ауданның ет өнімдерін өңдеу және өткізу әлеуетін арттырып, экспорттық мүмкіндіктерді кеңейтеді.
Инвестиция тарту – Сауран ауданының әлеуметтік-экономикалық дамуының негізгі бағыттарының бірі. Жаңа жобалардың жүзеге асуы өндіріс орындарының көбеюіне, жаңа жұмыс орындарының ашылуына, кәсіпкерлік белсенділіктің артуына және бюджетке түсетін салық көлемінің ұлғаюына ықпал етеді. Сонымен қатар аудан экономикасының жекелеген салаларға тәуелділігін азайтып, экономиканы әртараптандыруға мүмкіндік береді.
Экономиканы әртараптандыру – қазіргі кезеңдегі басты міндеттердің бірі. Сондықтан ауыл шаруашылығымен қатар қайта өңдеу өнеркәсібі, азық-түлік өндірісі, жиһаз жасау, агрохимия және логистика бағыттарын қатар дамыту ауданның экономикалық тұрақтылығын нығайтады. Әртүрлі өндіріс салаларының дамуы ішкі нарықты сапалы өніммен қамтамасыз етіп қана қоймай, экспортқа бағдарланған кәсіпорындардың қалыптасуына жол ашады.
Іссапар барысында кәсіпкерлер арасында іскерлік байланыстар орнатылып, тәжірибе алмасуға ерекше мән берілді. Осы мақсатта 2026 жылғы 10 маусымда Сауран ауданында Өзбекстанның Орта Шыршық ауданынан келетін 20 кәсіпкердің қатысуымен арнайы кездесу ұйымдастырылады. Бұл алаңда өндірісті ұйымдастыру, инновациялық технологияларды енгізу, инвестициялық жобаларды бірлесіп іске асыру және кәсіпкерлікті дамыту бағытындағы тәжірибелер талқыланады.
Экономикалық өзін-өзі қамтамасыз ету – кез келген өңірдің тұрақты дамуының басты көрсеткіші. Сауран ауданында жүзеге асырылатын жаңа жобалар сыртқы нарыққа тәуелділікті төмендетіп, жергілікті өндірісті күшейтуге, ішкі ресурстарды тиімді пайдалануға және қосылған құны жоғары өнім шығаруға мүмкіндік береді. Бұл ауданның инвестициялық тартымдылығын арттырып, өңір экономикасының бәсекеге қабілеттілігін күшейтеді.
Алдағы уақытта жұмыс сапары барысында көтерілген барлық бастамалар кезең-кезеңімен пысықталып, өзара тиімді әріптестікті дамыту жалғасады. Өзбекстанмен нығайып келе жатқан экономикалық байланыстар жаңа өндірістердің ашылуына, кәсіпкерліктің дамуына, инвестиция көлемінің артуына және Сауран ауданының әлеуметтік-экономикалық өсіміне тың серпін бермек.
Нақтылай кетсек, Өзбекстан Республикасының Ташкент облысында Қазақстан мен Өзбекстан арасындағы өңіраралық ынтымақтастықты дамытуға бағытталған «Шекарасыз ынтымақтастық» бизнес-форумы өтті. Ауқымды іс-шараға Түркістан облысының делегациясы құрамында Сауран ауданы әкімдігінің өкілдері мен жергілікті кәсіпкерлер де қатысты. Форумның алғашқы күнінде өңіраралық байланыстарды нығайту жөніндегі Мемлекет басшысының тапсырмасы аясында Түркістан облысының әкімі Нұралхан Көшеров пен Өзбекстан Республикасы Ташкент облысының әкімі Зойир Мирзаев бауырластық қарым-қатынастарды дамыту туралы меморандумға қол қойды.
