Мемлекет басшысы жариялаған Жұмысшы мамандықтар жылы аясында «AMANAT» партиясы 2025 жылды – Бастауыш партия ұйымдарының жылы деп белгіледі. Партияның төменгі буын ұйымдары көптеген еңбек ұжымдарында қызмет етіп, түрлі санатта жұмыс істеп жүрген нағыз кәсіби мамандарды біріктіреді.
Атаулы жылға орай, «AMANAT» партиясының Түркістан облыстық филиалы өз қанаты астындағы 242 бастауыш партия ұйымдарына әдістемелік қолдау көрсетуде, олардың үздік жұмыс тәжірибелерімен бөлісуде және бір мүдде, ортақ мақсат аясына топтасқан партияластар арасында тығыз әріптестік байланыстар орнықтыруда оқу семинарларын өткізуді бастады. Бұған дейін мұндай оқу жиындары Сайрам ауданында осы аймаққа жақын аумақтардан – 69, Түркістан қаласында – 85 бастауыш партия ұйымдары жетекшілерінің басын қосты. Осы мақсаттағы семинар Сарыағаш ауданында өтіп, оған Қазығұрт, Мақтаарал, Шардара, Келес, Жетісай аудандарынан барлығы 88 бастауыш ұйымдардың төрағалары жиналды.
Сарығаш ауданына жиналған семинар қатысушылары үшін алдымен «Қызылжар» бастауыш партия ұйымының жұмыс тәжірибесі таныстырылды.
Партияның облыстық филиалының төрағасы Алтынсары Үмбетәлиев, 8 мыңнан астам азамат тұратын ауылда партияластарымыздың қатарын көбейту керек екенін айтып, «Кітап-AMANAT» жобасын бастауыш ұйымдардың базасында жалғастыру керек деген ұсынысын білдірді.
Семинарға келген аманаттық өкілдер партияның Сайлауалды бағдарламасын Түркістан облысында іске асыру жөніндегі Жол картасында қамтылып, тұрғындар игілігіне пайдалануға берілген Дербісек ауылындағы 900 орындық «Жайлы мектептің», Жемісті ауылындағы отбасылық дәрігерлік емхананың жабдықталу ахуалымен танысты. Семинар жұмысы әрі қарай Қабыланбек ауылдық округінде жалғасып, делегаттар «Жабай ата» шаруа қожалығының жылыжай кешенін аралап көрді.
Түркістан облысы республикада ауыл шаруашылығы саласы бойынша көш бастап тұрған өңір екені белгілі. Ал Сарыағаш ауданы – жылыжай шаруашылығы бағыты бойынша облысымыздағы ең үздік аудан санатында.
Партия өкілдерімен кездесуге келген жергілікті шаруалар көмірмен қамту мәселесін, жылыжайларды табиғи газға көшіру ұсыныстарын ортаға салды. Бастауыш партия ұйымдарына әдістемелік көмек көрсетуге арналған семинар жұмысы Қабыланбек жоғарғы агро-техникалық колледждің мәжіліс залында жалғасты. «AMANAT» партиясы Түркістан облыстық филиалының төрағасы Алтынсары Үмбетәлиевтің төрағалығымен өткен семинар жұмысына Сарыағаш ауданының әкімі Арман Абдуллаев, Қазығұрт, Мақтаарал, Жетісай, Сарыағаш, Келес, Шардара аумақтық партия филиалдарының төрағалары мен атқарушы хатшылары, бастауыш партия ұйымдарының төрағалары, партияның қызметкерлері қатысты.
Облыстық партия филиалының мамандары әдістемелік көмек ретінде хабарламалар жасады. Жиында жұмыс көрсеткіштері қаралып, бастауыш ұйымдардың жұмыс белсенділігін қамтудың басымдықтары айтылды. Партияның Сайлауалды бағдарламасының орындалуын қамтуда төменгі буын ұйымдардың жұмыс белсенділіктері сараланды, тұрғындармен кері байланыс орнатуда қоғамдық қабылдаулар өткізу, оның ішінде жергілікті жерлерде сол аймақтан сайланған мәслихат депутаттарының азаматтармен кездесулерін өткізу, партиялық жобаларды нақтылы іске асыру талаптары айтылды. Іс құжаттарын жүргізуде регламенттік талаптардың сақталуын қамту мәселесі жан-жақты қаралды, ұсыныстар берілді.
Сондай-ақ семинар барысында «Дербісек» бастауыш партия ұйымының төрағасы Берік Есенбековтың, “Қызылжар” бастауыш партия ұйымының төрағасы Нұрлыбек Налибаевтың хабарламасы тыңдалып, жұмыс тәжірибесі зерделенді. Партиялық қызметті жетілдіруге бағытталған семинарға қатысушылар тарапынан берілген ұсыныстар филиал төрағасы тарапынан бақылауға алынбақ.
Жиын соңында жұмыс көрсеткіштері жоғары 12 бастауыш партия ұйымдарының төрағаларына «AMANAT» партиясы Түркістан облыстық филиалының төрағасы Алтынсары Үмбетәлиевтің Алғыс хаты табысталды.
«AMANAT» партиясы Түркістан облыстық филиалының баспасөз қызметі
