Қазақстан Президенті Қасым-Жомарт Тоқаев халыққа арнаған Жолдауында жаңа Қазақстанның жоспарларымен бөлісті. Бұл – тек саяси реформалар ғана емес, сонымен қатар халықтың табысын арттыру, өмір сүру сапасын жақсарту, адамдар үшін қолайлы жағдай жасау. Жолдаудың міндеттерін жүзеге асыруда азаматтық қоғам өкілдеріне де үлкен жауапкершілік жүктеліп отыр.
Мемлекет басшысы үкіметтік емес сектор маңызды әлеуметтік мәселелерді үнемі көтеріп, кешенді шешуге жәрдемдесетінін айтты. Реформаларды дайындау мен іске асыруға қоғамдық ұйымдар мен белсенділерді неғұрлым кеңінен тарту қажет.
Сонымен қатар, Президент ұсынған реформалар, дұрыс орындалған жағдайда, үкіметтік емес ұйымдарды күшейтеді, оларды бірінші кезекте жергілікті атқарушы билік үшін жаңа қоғам құруда нақты көмекші етеді. Билік пен қоғам арасында көпір қызметін атқаратын “Ұлттық құрылтай” жаңа қоғамдық институтын құру туралы ұсыныс та өзекті.
ҮЕҰ өкілдері өз қызметін жандандыратынына және Президент Жолдауында айтылған міндеттерді орындауда белсенділік танытады деген сенімдемін. Президентіміздің Жолдауына қолдау білдіре отырып, ел бірлігін бекемдеуге және қоғамдық келісім мен татулықты нығайтуға өз үлесімізді қосуды азаматтық парызымыз деп санаймыз. Барлық азаматтық қоғам институттары осы кезеңде еліміздің бастан кешкен қиындықтарын бірге өткеріп, үлкен белестерді бағындыруға атсалысты. Еліміздің дамуы мен демократиялануына өзіндік үлесін қосты.
Үкіметтік емес ұйымдар мемлекеттің теңқұқылы серіктесі және ішкі саяси тұрақтылықты сақтап қалуда, мемлекеттік органдарға азаматтық қоғам институттарының үлкен көмек көрсететінін әлемдік тәжірибе дәлелдеп отыр. Осы орайда, қоғамда күнделікті орын алатын өзгерістерді, тұрғындардың мұң-мұқтажын халықпен етене араласатын үкіметтік емес ұйымдар, билік органдарының назарына жеткізе алатын бірден-бір азаматтық институт болуымыз керек. Түркі әлемінің рухани астанасы – Түркістанда «Республикалық Чернобыль ардагерлерінің Орталық кеңесі» бірлестігінің жұмысын жандандыру мейірімділік пен гуманизм қағидаттарында ішкі саяси топтасу процестерін тереңдетуде маңызды рөл атқаратыны анық.
Президентіміз Қасым-Жомарт Кемелұлы Тоқаев бар жетістігіміз ел бірлігінің арқасында жүзеге асатынын үнемі айтып келеді. Бұл ретте, Мемлекет басшысының «ҚОҒАМНЫҢ ҚУАТТЫ КҮШІ – БІРЛІКТЕ» деген маңызды пікірі қазіргі кезге өте қажет, бұл – баршамыздың басты ұстанымымыз болуы тиіс.
Бақытжан ӘШІРБАЕВ,
«Чернобыль ардагерлері және мүгедектері» қоғамдық бірлестіктерінің үйлестіру кеңесінің төрағасы
