Өткен жылы Президенттің «Әділетті Қазақстан: бәріміз және әрқайсымыз үшін. Қазір және әрдайым» атты сайлауалды бағдарламасына сәйкес азаматтар өмірінде және бизнес жұмысында кездесетін жағдайларды кешенді цифрландыру басталды. Бірқатар бастамалар оң нәтиже беріп үлгерді.
Мысалы, 2023 жылы автокөлікті қайта тіркеу бойынша мәмілелердің шамамен 55%-ы (шамамен 2,3 млн) онлайн форматта жүргізілді. Жүргізуші куәлігін қайта жасау рәсімі цифрландырылды және көліктің техникалық тексерістен өткені туралы деректер eGov-қа шығарылды. e-Salyq Azamat және Е-нотариат мобильді қосымшалары арқылы азаматтар үшін кедендік декларация тапсырып, онлайн сенімхат рәсімдеу және нотариустардан видео арқылы консультация алу мүмкіндігі туды.
Сонымен қатар 17 жастағы 150 мыңға жуық ер бала үшін әскери есепке алу науқанының форматы жеңілдетілді: енді құжаттарды жинап, әскери комиссариаттарға бару және медициналық комиссиядан өту қажет болмайды. 1,3 млн-ға жуық азамат ХҚКО немесе әскери комиссариаттарға бармай-ақ мекенжайы бойынша проактивті форматта есепке тұра алады.
Оған қоса техникалық және кәсіптік білім туралы дипломдардың түпнұсқа екенін тексеру үшін QR-кодтар енгізілді, талапкерлер немесе олардың өкілдері білім беру гранты табысталғаны туралы SMS ала алады. Сондай-ақ Enbek.kz порталы арқылы онлайн режімде еңбек шарттарын жасайтын сервис іске қосылды. Жалпы, 2023 жылдың қорытындысы бойынша қанатқақты немесе толық режімде 146 цифрлық бастама іске асырылды.
Айта кету керек, бюрократиядан арылту және цифрландыру бойынша жұмысқа «Самұрық-Қазына» АҚ және «Бәйтерек» холдингі де тартылған.
Еске сала кетсек, таяуда елімізде Astana Hub корпоративтік қоры ai.astanahub.com цифрлық платформасы іске қосылды. Жаңа платформа инновациялар мен әртүрлі салаларда жасанды зиятты қолдануға ықпал ететін бірыңғай кеңістікті қалыптастыру үшін үкіметтің, бизнес пен білім беру саласының күш-жігерін жұмылдырады
