Елімізде жыл сайын өтетін Солтүстік Каспий аймақтық «Atyrau Oil&Gas» және «AtyrauBuild» көрмесіне қызығушы көп. Биыл оған отандық кәсіпорындармен бірге Аустрия, Әзербайжан, Германия, Қытай, Ресей, Түркия, Финляндиядан мұнай-газ саласындағы 102 компания қатысты.
Көрмеге жыл сайын демеушілік көрсететін «Теңізшевройл» ЖШС (ТШО) бас директорының орынбасары Көңілқош Сүйесіновтің айтуынша, шетелдіктермен бірлескен компанияның қызметін серіктестікпен табысқа жетудің жарқын мысалы деуге болады. Компания 30 жылдан бері «Теңіз» кен орнындағы жаңа өндіріс орнына жаңа технологиялардың енгізілуіне инвестиция салып келеді. Бұл кен орнынан өндірілетін мұнай көлемін жылына 1 миллионнан 29 миллион тоннаға дейін арттыруға серпін берді.
Ал кейінгі он жылда ТШО-ның өндірістік қызметі еліміздегі ішкі жалпы өнімнің шамамен 11%-ын ынталандырып, мемлекеттік кірістің шамамен үштен бірін қамтамасыз етті. Тек өткен жылы компания ел бюджетіне шамамен 14 миллиард доллар төледі.
– ТШО ресурстық перспективасы мол ең ірі әрі ең күрделі кен орындарының бірін игереді. Біздің халықаралық сапа және қауіпсіздік стандарттарына сәйкес келетін, сапалы тауарлар мен қызметтерді, бәсекеге қабілетті бағаларды және инновациялық бизнес шешімдерін ұсынатын әлеуетті жеткізушілермен стратегиялық әріптестікті қолдаймыз. Серіктес кәсіпорындармен бірге жергілікті қамтудың үлесін ұлғайтып отырмыз. Бұл – отандық экономиканың өркендеуіне серпін беретін, өндірістік қажеттілікті қамтамасыз ететін, жергілікті кадрлардың біліктілігін арттыруға жол ашатын жүйелі әрі ұзақмерзімді іс, – дейді К.Сүйесінов.
Мұнай-газ саласында сан алуан операциялық үдеріс бар. Оған жасанды интеллект жобасын қолдану жайлы ТШО сарапшылары болашаққа жасалған болжамды да өзгерте алатын қуатты құрал деп санайды. Тіпті бұл құралмен стратегиялық міндеттерді де шешуге болатынына сенім білдіріп отыр.
