Президент Қасым-Жомарт Тоқаев Қазақстанды цифрлық дамыған мемлекетке айналдыру стратегиялық мақсат екенін айқындады.
«Біздің маңызды стратегиялық міндетіміз – Қазақстанды ІТ мемлекетке айналдыру. Цифрландыру ісінде нақты жетістіктеріміз де жоқ емес. Біз электронды үкіметті және финтехті дамыту индексі бойынша әлем көшбасшыларының қатарында тұрмыз. Былтырдың өзінде ІТ саласындағы экспортымыз бес есе өсті. Жыл соңына дейін бұл көрсеткіш 500 миллион долларға жетуі мүмкін. Әрине, мұнымен шектелмейміз. 2026 жылға қарай ІТ қызметтерінің экспортын бір миллиард долларға жеткізу – Үкіметке жүктелетін жаңа міндет. Шетелдің ірі ІТ компанияларымен бірлескен кәсіпорындар ашу бұл іске септігін тигізері сөзсіз. Үкімет осы мәселені мұқият зерделеп, нақты ұсыныстар енгізуі керек», деді Президент.
Осы орайда, биылғы оқу жылында бакалавриат бойынша 78 219 білім гранты бөлінеді. Бұл туралы Ғылым және жоғары білім министрлігіне қарасты Жоғары және жоғары оқу орнынан кейінгі білім комитеті төрағасының орынбасары Жанна Есинбаева мәлімдеді.
«2024-2025 оқу жылына арналған мемлекеттік білім беру тапсырысы бекітілді. Түлектер қандай бағыттар, білім беру бағдарламаларының қандай топтары бойынша қанша грант бөлінгенін көре алады. Биыл Ғылым және жоғары білім министрлігінің желісі бойынша бакалавриат деңгейіне – 78 219 грант, магистратура деңгейіне – 13 119 және докторантура деңгейіне – 1 919 грант бөлдік», деді Жанна Есинбаева.
Есинбаеваның мәліметінше, биыл ең көп грант инженерлік-техникалық салаларға бөлінеді. Бұл Мемлекет басшысының техникалық бағыттағы мамандарды даярлауға қатысты жүктеген тапсырмасына сәйкес жүзеге асырылды.
«Инженерлік ғылымдар, құрылыс ғылымдары, ақпараттық-коммуникациялық технологиялар, ақпараттық қауіпсіздік, жаратылыстану ғылымдары, математика, статистика – мұның барлығы мемлекеттік тапсырыстың жалпы көлемінің шамамен 60%-ын құрайды», деп қосты Ж.Есинбаева.
Ал педогогикалық бағыттағы мамандықтарға биыл 13 мың грант бөлінеді.
