Жанар-жағармай бағасы тұрақталмаса, соны сылтау етіп екінші жағын қымбаттатуы әбден мүмкін ғой…
Көрші елдерде жанар-жағармай бағасы былтыр күзде күрт көтерілген кезде, Қазақстан да дизель отынын өндіру көлемін арттырды. Бірақ бұл оның тапшылығын болдырмауға көмектеспеді, яғни мұндай шешімнің нарықтағы ахуал үшін тиімсіздігіне көз жеткізілді. Биыл да көрші елдердегі мұнай өнімдерінің бағасымен айтарлықтай айырмашылық сақталып отыр. Соның салдарынан өткен жылғы наурыз айымен салыстырғанда тұтыну көлемі 15%-ға артқан, яғни, көрші елдерге тасымалдау көп.
«Бұл жағдай сақтала берсе, онсыз да шетел асып отырған қазақстандық дизельдің көлемі арта түсіп, биылдың өзінде 850 мың тонна тапшылыққа тап болуымыз мүмкін», деді жанар-жағармай бағасын реттеуге қатысты арнайы өткен брифингте сала басшысы. Яғни, дәл қазір Қазақстан өзінің ұлттық, мемлекеттік мүдделерін «жиып қойып», арзан отынмен басқа елдердің экономикасын субсидияландырып отырған тәрізді көрінеді.
Жанар-жағармай бағасының көршілес елдермен салыстырғанда біздің елде тым төмендігі осылайша өзіміздің ұлттық мүддемізге қайшы келіп, оған айтарлықтай зардабын тигізіп отыр. Демек, бағаны реттеу, тым болмаса сәл де болса көршілес елдердегі бағамен сәйкестендіру – ел мүддесін қорғау жолындағы кезек күттірмейтін шара!
