Энергетика министрлігі елде бензин мен дизель тапшы болмауы үшін қолынан келген барлық шараларды қабылдап-ақ жатыр. Санамалап айтатын болсақ, жанармайды темір жол және көлікпен елден шығаруға тыйым салынған.
Оларды өндірушілерді жанармайды жанармай станцияларына тікелей сатуға міндеттейтін заңнамалық нормалар да қабылданды. Мұнайды жеткізу және мұнай өнімдерін сату кезіндегі тиімсіз делдалдардың көзі жойылды. Тіпті, өткен жылы сараланған баға мен лимиттер де енгізілген.
Алайда, барлық шектеулерге қарамастан, барлық шектеу мен тосқауылдарды айналып өтіп, бас пайдасы үшін «көлеңкелі экспорт» арқылы отынды сыртқа тасымалдаушылардың жолын кесу мүмкін болмай отыр. Ал нарықтағы ахуалды жақсартпаса болмайды. Демек, жүйесіздік пен берекесіздік, тұралау орын алмас үшін әрі шұғыл, әрі тиімді шараларды қолға алу қажеттілігі туындады.
Ведомство сол себепті жанар-жағармай мен дизель тапшылығын болдырмау үшін бағаны реттеуге, яғни көршілес елдермен теңестіруге мәжбүр екендіктерін мәлімдеді. Бұл орынды да, жалпы нарықтағы құбылмалылықты ескеріп, соған сай шешімдер қабылданып, нақты әрекет еткен жағдайда ғана ел экономикасы тұрақты дамиды, көсегесі көгереді.
Маржан Ержанқызы,
«Ассамблея жастары» РҚБ Түркістан облыстық өкілдігінің мүшесі
