Сарапшылардың сөзінше, бұл агенттер – жасанды интеллектінің ерекше қуатты көмекшілері. Мысалы олар қажет деректерді алып, әртүрлі қосымшаларға енгізіп, сіздің атыңыздан есептер дайындай алады. Мұндай құралдар уақытты үнемдеп, жүйкеңізді тоздыратын жұмыстарды жеңілдетуге жәрдем береді.
Ірі технологиялық компаниялар ЖИ агенттерін дамытуды күшейтіп жатыр. «Microsoft» компаниясы оларды қолдану арқылы өз көрсеткіштерін жақсартып жатқанын мәлімдеді. Компанияның деректеріне сүйенсек, «ІТ» мәселелерді шешу тиімділігі 36%-ға, ал сатылымдардан түсетін кіріс 9,4%-ға артқан. Сонымен қатар кадрлық жұмыстарды жүргізу уақыты да қысқарған.
ЖИ агенттерін қолдануға біраз уақыт қажет болуы мүмкін. Бірақ технологиялық компаниялардың күткен үміті ақталса, бұл агенттер генеративті жасанды интеллектінің жаңа әрі тиімді құралдары ретінде танылып, көп пайдаланушыны тарта алады. «Microsoft» вице-президенті Рэй Смиттің айтуынша, ЖИ агенттері барлық жасанды интеллектінің орталықтандырылған басқару жүйесі ретінде жұмыс істейді.
Елімізде де осы жылы салаға серпін беретін жаңалықтар көп болмақ. Мемлекет басшысының тапсырмасымен жасанды интеллект халықаралық орталығы ашылады. Президент «Ana tili» газетіне берген сұхбатында: «Бұл орталық инвестиция тартатын, әлемдік тәжірибені және инновацияларды енгізетін орынға айналуы керек», деп атап өтті.
Айта кетейік, жасанды интеллект орталығы «ЭКСПО» аумағында орналасады. Мұнда оқыту бағдарламалары іске асырылып, стартаптарды қолдайтын арнайы кампус құрылмақ. Ірі халықаралық компаниялар осы жерде жасанды интеллект орталықтары мен зертханаларын ашады. Мемлекеттік органдар, жеке секторлар ғалымдармен бірлесіп, жасанды интеллектіні экономиканың барлық саласына енгізу бағытында жұмыс істейді. Қазіргі кезде орталықты құру үшін «ЭКСПО» нысандарын қайта жасақтау басталып кетті. Орталық жыл соңына дейін қолданысқа беріледі.
Сонымен қатар алдағы 5 жылда жасанды интеллект саласында 1 миллион адамды оқыту жоспарланып отыр. Цифрлық даму, инновациялар және аэроғарыш өнеркәсібі министрі Жаслан Мәдиевтің айтуынша, 500 мың мектеп оқушысы, 300 мың студент, 90 мың мемлекеттік қызметші, 80 мың кәсіпкер, 30 мың әлеуметтік сала маманы мен басқа да азаматтар оқытылады. Барлық оқыту бағдарламасы алдын ала тексерістен өтіп, әр санатқа арнайы әзірленген. Сабақтар онлайн және офлайн форматта ұйымдастырылады.
Ж.Мәдиев бұл бастама білім жобасы ғана емес, елдің экономикалық, технологиялық дамуына жаңа серпін беретін ауқымды қадам екенін атап өтті.
ПІКІРЛЕР АЛАҢЫ
Жаслан Мәдиев, Цифрлық даму, инновациялар және аэроғарыш өнеркәсібі министрі:
– Біздің алдымызда интеллектуалды, креативті және озық құралдармен жабдықталған технологиялық дамыған қоғам құру міндеті тұр. Бұл мақсатқа «Generative Nation» деп аталатын жаңа тұжырымдама арқылы қол жеткізуді жоспарлап отырмыз, бұл біздің болашақ қоғамын құруға деген ұмтылысымызды білдіреді. Мұндай тәжірибе басқа елдерде де сәтті қолданылып келеді.
Жаңа технологиялар мен жасанды интеллект қоғамның барлық саласына енген сайын, біз адам өмірінің сапасын жақсартып, еңбек нарығының сұранысына сай жаңа мамандықтар мен дағдыларды қалыптастыра аламыз. Сонымен қатар бұл өзгерістер жаңа кәсіпорындардың, стартаптардың дамуына мүмкіндік туғызып, экономикалық үдерістердің тиімділігін арттыруға жол ашады.
Джеймс Зоу, Стэнфорд университеті Биомедициналық деректер ғылымы кафедрасының доценті, информатика және электртехника саласының маманы:
– Биыл жасанды интеллектінің жеке модельдерінен бірнеше агенттің бірлесіп жұмыс істейтін жүйелеріне өтеміз. Жақында виртуалды зертхана жобасын ұсындық. Бұл жобада әртүрлі жасанды интеллект агенттері әртүрлі мамандықта жұмыс істейді. Мысалы, профессор-агент зерттеуді басқарып, химик ЖИ немесе биолог ЖИ өз салаларында нақты тапсырмаларды орындайды. Адам-зерттеуші осы үдерісті бақылап, кері байланыс береді. Нәтижесінде виртуалды зертханада «SARS-CoV-2» вирусына қарсы тиімді заттар жасалды. Болашақта қосымшалар бір модельге қарағанда, бірнеше агенттің көмегімен сенімді әрі тиімді жұмыс істейтін болады. Мен әсіресе адам басқаратын бірнеше агенттен тұратын топтардың мүмкіндігіне қызығушылық танытып отырмын.
Павел Бутенко, Цифрлық трансформация және жасанды интеллект шешімдерін енгізу жөніндегі сарапшы:
– Осы жылы мультимодалды жасанды интеллектіні қолдану негізгі үрдіске айналады. Бұл технология мәтін, сурет, аудио және видео сияқты әртүрлі деректі біріктіріп, өңдеуге мүмкіндік береді. Мультимодалды ЖИ адам мен компьютер арасындағы байланысты табиғи және түсінікті етіп, клиенттерге ыңғайлы интерфейстер ұсынады. Мысалы, дүкенде клиент виртуалды көмекшіге қалаған заттың суретін көрсетіп, дауыспен сипаттаса, көмекші тауардың қолжетімділігі, бағасы мен балама нұсқалары туралы ақпарат береді.
Сонымен қатар ЖИ-агенттерді қолдану кең таралады. Олар адамның араласуынсыз шешім қабылдап, тапсырмаларды орындауға қабілетті. Мұндай агенттерді пайдалану бизнеске нарық өзгерістеріне жедел бейімделуге, шығындарды азайтуға әрі жұмыс өнімділігін арттыруға көмектеседі.
Халфан Белхул: «Dubai Future Foundation» бас директоры:
– Жасанды интеллект геномды секвенирлеу үдерісін түбегейлі өзгертіп, генетикалық деректерді жылдам әрі дәл талдауға мүмкіндік беріп отыр. Бұл дегеніміз, денсаулық сақтау саласын жекелендірудің жаңа деңгейіне жеткізіп, әр адамның генетикалық ерекшеліктеріне негізделген емдеу тәсілдерін ұсына алатын боламыз. ЖИ көмегімен сирек кездесетін немесе күрделі аурулардың генетикалық себептерін анықтау уақыты айтарлықтай қысқарады. Сонымен қатар кей аурулардың пайда болу қаупін ерте кезеңде болжауға мүмкіндік артып, алдын алу шараларын уақтылы жүргізу мүмкіндігі туады. ЖИ шешімдері дәрілік заттарды әзірлеу жылдамдығын да арттырып, олардың әрбір адамға сәйкестігін генетикалық деңгейде қамтамасыз етуге ықпал етеді. Бұл тәсіл созылмалы және тұқым қуалайтын аурулармен күресуде жаңа жетістіктерге жеткізеді.
