Цифрлық даму, инновациялар және аэроғарыш өнеркәсібі министрлігі өткен жылы цифрлық қызметтердің артқанын мәлімдеді.
Соны бірі – Қорғаныс министрлігімен бірлесіп, мерзімді әскери қызметке шақыруды кейінге қалдыру құқығы бар азаматтарды автоматты түрде хабарландыру тетігі іске қосылды. Оларға SMS-хабарламалар тәжірибелік форматта жіберіледі және бұл ретте, уәкілетті органдарға барып ақпарат жинаудың қажеттілігі жоқ.
Одан бөлек, қазақстандықтар қорғаншылық және қамқоршылық туралы анықтаманы eGov платформасы мен eGovMobile қосымшасы арқылы 30 минут ішінде ала алатыны белгілі болды. Бұл туралы ведомствоаралық комиссия барысында Оқу-ағарту министрлігінің өкілдері хабарлады. Болашақта мұндай анықтама сол қосымшадағы цифрлық құжаттар тізіміне қосылуы мүмкін.
Естеріңізде болса, биылғы Ұлттық құрылтайда Мемлекет басшысы Қасым-Жомарт Тоқаев Қазақстан жаппай цифрланған және жасанды интеллект жүйесі қарқынды дамыған елге айналуға тиіс екендігін айтты.
«Қазақстан жаппай цифрланған және жасанды интеллект жүйесі қарқынды дамыған елге айналуға тиіс. Бұл – біздің стратегиялық міндетіміз. Осы технология таяу болашақта әлемді түбегейлі өзгертеді. Біз барлық салада цифрлы номадтар өркениетінің озық стандарттарына сай болуымыз керек. Жастарымыздың әлеуеті мен менталитеті, қарым-қабілетіне қарасақ, «Қазақстанның қарышты қадамын» жасауға біздің толық мүмкіндігіміз бар екені байқалады. Басқа-басқа, бірақ дәл осы жерде батыл қимылдап, құлашымызды кең сермеуден қорықпау керек», – деген еді ел Президенті өз сөзінде.
Демек, 2025 жылға дейін ұлттық жоба аясындағы жұмыстар тұрақты түрде іске асырылып, цифрлық мүмкіндігіміз арта түседі деп ойлаймыз. Жалпы, жоспар бойынша елімізде жасанды интеллект саласында жыл сайын 1000 маман дарялануы керек. Жасанды интеллект саласында жыл сайын 100 стартап іске қосу бойынша міндет қойылып отыр.
