Қазақстандық ғалымдар жасанды зерденің көмегімен агросаланы қазіргіден 60 пайызға өнімді етудің жобасын ұсынды.
Ғалымдар спутниктік түсірілімдерді агросалаға бейімдеу арқылы алқаптағы мәселелерді көрсететін әдіс ойлап тапқан. Мысалы, 1 мың гектарды диқан көзбен көре алмайды. Ал ғалымдар әдісі оның әрбір бұрышын анық көрсетіп береді. Мультиспектрлі дронды дәлдік үшін пайдаланады. Белгілі бір бұрыштан және биіктіктен суретке түсіреді. Ұшу кезінде олар өсімдіктердің даму динамикасын көре алады. Суреттер арқылы олар есептеу үдерісін жеңіл жүргізеді.
Айталық, егер мәні -1 болса, онда бұл су. 0,3 – өсімдік әлсіз немесе ауру. Егер 0,6 болса – өсімдіктің денсаулығы қалыпты. Егер индекс 0,6-дан үлкен болса, онда өсімдік сау. Индекстер өсімдіктердің әлсіз дамуын көрсететін жерде агрономдар агрохимиялық талдау жүргізіп, бағалайды, тыңайтқыштар туралы кеңес айтады.
Түсінікті болуы үшін айта кету керек, өсімдік индекстерін есептеу үлкен егістіктерге пайдалы. Ондай алқаптарда фермер жүре алмайды, қиынға түседі. Ал дрон ұшып, ғалымдарға есептеуге қажетті суреттерді түсіреді. Деректер дереу серверге жіберіліп, онда бағдарлама деректерді өңдейді. Ал агроном фермерге қай бөлікке назар аудару керектігі туралы кеңес береді.
Еске сала кетсек, жоспар бойынша елімізде жасанды интеллект саласында жыл сайын 1000 маман дарялануы керек. Мемлекет басшысының айтуынша, алдағы уақытта кейбір отандық жоғары оқу орындарында «Google» және «Huawei» халықаралық компанияларының тиісті курстары өтпек. Корея мен Қытайдың жоғары оқу орындарымен білім беру және мамандарды бірлесіп даярлау бойынша келісім жасалды. Жасанды интеллект саласында жыл сайын 100 стартап іске қосу бойынша өршіл міндет қойылып отыр.
