Түркістан қаласында жоғары оқу орындары мен арнаулы оқу орындарының және мектеп оқушыларының қатысуымен дәстүрлі «Есірткісіз болашақ!» атты акция ұйымдастырылды. Акцияға Қожа Ахмет Яссауи атындағы Қазақ-Түрік Университетінің оқытушылары мен студенттері ұйытқы болды. «Нашақорлық және есірткі бизнесіне қарсы күрес» мақсатында өткен шара барысында жастар арасында синтетикалық есірткі заттарының белең алуының алдын алуға баса мән берілді.
Ұйымдастырушылар рухани астанамыздағы бірқатар қоғамдық орындар мен «Керуен сарай» ойын-сауық кешенін аралап, жастарға үгіт-насихат жұмыстарын жүргізді.
Шараның ашылу салтанатына Түркістан облысы әкімінің аппараты мемлекеттік құқықтық бөлімінің бас маманы Ләззат Ибадуллақызы, Түркістан облысының адами әлеуетті дамыту басқармасының Тәрбие және қосымша білім беру бөлімінің басшысы Жандос Маханбетұлы, Түркістан қаласы адами әлеуетті дамыту бөлімінің басшысы Оразкүл Шайхықызы, Түркістан облысы «Қоғамдық денсаулық басқармасы» облыстық психикалық денсаулық орталығының нарколог дәрігері Дәметкен Алмаханқызы және психолог мамандар, ұстаздар мен оқушылар қатысты.
«Есірткісіз қоғам құру – Қазақстанның әрбір азаматының алдындағы міндет. Есірткінің, оның ішінде синтетикалық есірткінің таралуы болашақ ұрпақтың әл-ауқатына қауіп төндіретіні бәріңізге белгілі. Осыған орай мектептерде есірткіге қатысты түрлі іс-шаралар көптеп өткізілуде. Жасөспірімдерге есірткінің зияны туралы айтылатын пайдалы жиындарды өткізу арқылы олардың есірткіге тәуелді болмау жолдарының алдын алуға болады», – деді Түркістан облысы әкімінің аппараты мемлекеттік құқықтық бөлімінің бас маманы Ләззат Ибадуллақызы.
Бүгінде қалалық білім ошақтарында түрлі семинар, дәрістермен дөңгелек үстел, сондай-ақ ата-аналардың қатысуымен түрлі шаралар ұйымдастыру дәстүрге айналған. Ондағы мақсат – өскелең ұрпаққа оң ықпал етіп, салауатты болашақты қамтамасыз ету.
Шараға қатысушы жастар есірткі бизнесіне қарсы күрес жүргізу тақырыптарында бірқатар ұсыныстар айтып, оның алдын-алу шараларын күшейтуді қолға алу керек екенін тілге тиек етті.
