Мемлекет басшысы елімізде еңбекқор адам, кәсіби маман ең сыйлы адам болуға тиіс деді. Жастар нақты бір мамандықтың қыр-сырын жетік білуге ұмтылғаны жөн екенін айтты. Осы орайда, «AMANAT» партиясы жасампаз еңбек қоғамды біріктіруші күшке айналуы тиіс деп біледі. Әр адамның еңбек етуге мүмкіндігі болуы қажет деп санайды.
Жастардың адал еңбекке ұмтылысын қолдау, олардың белгілі бір кәсіп иесі болуына жәрдемдесу, бойындағы қарым-қабілетімен еңбек нарығында өзіндік орнын табуына көмек көрсету бағытында «Жастарға жұмыс» партиялық жобасы қолға алынған болатын. Ұлттың жаңа сапасын қалыптастыруға үлес қосатын жоба қоғамда еңбек адамының бірінші орында тұруына үн қосып, табысқа жетудің жалғыз жолы – азаматтың еңбеккерлігі мен іскерлік қасиеті екенін түйіндейді.
Халқының 30 пайыздан астамын жастар құрайтын Түркістан облысында партияның өңірлік филиалы жанындағы «Жастар рухы» жастар қанатымен «Жастарға жұмыс» партиялық жобасы шеңберінде биылғы жылы облыс аудандары мен қалаларында 9 мақсатты кездесу өткен. Партиялық алаңда өткен жүздесулерге ауыл-аймақтарда қызмет атқаратын 100-ге жуық ұйымдар мен өндіріс орындары өздерінде бар жұмыс орындарын жастарға таныстыруға, бір командада ортақ мақсат аясында еңбек етуге шақыруға мүмкіндік алған.
Партиялық жобаны іске асыруда Түркістан облысының жұмыспен қамтуды үйлестіру және әлеуметтік бағдарламалар басқармасымен, облыстық «Еңбек мобильдігі орталығы» мекемесімен және осы мекеменің 17 аудан мен қаладағы дербес орталықтарымен ықпалдастық орнатылған. Айта кету керек, Түркістан облысында 2023 жылы 109,7 мың жұмыс орнын ашу жоспарланған.
Аталған жерглікті уәкілетті органдармен биыл «Кәсіпкерлікті дамытуға арналған ұлттық жобасын» жүзеге асыруға жалпы 112,4 мың адам жұмыспен қамту шараларына жолданған. Оның ішінде 40,2 мың адам – тұрақты, 36,2 мың адам – субсидияланған уақытша жұмыс орындарымен қамтылған. Одан бөлек, Мемлекет басшысының «10 мың тұрғынға 100 жаңа жұмыс орындарын құру» жөніндегі тапсырмасына сәйкес, облыс бойынша шағын және орта бизнес субъектілері арқылы 11 ай қорытындысымен 26 421 жұмыс орны құрылған.
«Еңбек» бағыты аясында 9,0 мың адамды – «Жастар практикасы» жобасымен, 5,2 мың адамды – әлеуметтік жұмыс орындарымен, 14,5 мың адамды – қоғамдық жұмыс орындарымен, 2,1 мың адамды – «Алғашқы жұмыс орны» жобасымен жұмыспен қамту жұмыстары жүргізіліп, іске асырылуда. Жұмыспен қамтудың белсенді шараларын аяқтаған 11988 азаматтың 4773-і немесе 35%-ы тұрақты жұмыспен қамтылған.
Жаңа бизнес идеяларды жүзеге асыруды қолдау мақсатында 2,3 млрд. теңге қаржы қаралып, облыс көлемінде 1 688 азамат мемлекеттік грант алған. Сонымен қатар, биылғы жылдан бастап 35 жасқа толмаған 594 азаматқа 2,5 пайыздық мөлшерлемемен бес млн. теңгеге дейін жеңілдетілген шағын несие беру жоспарланған болатын. Оны іске асыруға 2 млрд 970 млн.теңге қаржы қаралған. Бүгінгі таңда, 933 жоба конкурстық комиссия қарауына ұсынылып, 583 адамның жобасы 2 млрд 772,7 млн.теңгеге мақұлданған.
Жастарды жұмыспен қамту саласындағы міндеттер жергілікті мәслихаттар құрамындағы партиялық фракция депутаттарының, партияның облыстық филиалы жанындағы жастарды қолдау жөніндегі кеңестің және партия филиалының «Жастар рухы» жастар қанатының тұрақты бақылауына алынған.
