Мемлекет басшысы Қасым-Жомарт Тоқаев ҚР Өнеркәсіп және құрылыс министрі Қанат Шарлапаевты қабылдады.
Биылғы қаңтар-ақпан айларында Қазақстанның өңдеу өнеркәсібіндегі өсім 7,4 пайызды құраған.
Қанат Шарлапаев өнеркәсіптік даму, геология, жер қойнауын пайдалану және құрылыс салаларындағы жұмыстың нәтижесі мен алдағы кезеңге арналған жоспары жөнінде баяндады.
Биылғы қаңтар-ақпан айларында Қазақстанның өңдеу өнеркәсібіндегі өсім 7,4 пайызды құраған.
Өндіріс көлемін ұлғайтуда машина жасау, металлургия, химия және жеңіл өнеркәсіп сияқты салалардың үлесі зор.
Жалпы құны 1,5 трлн теңге болатын 180 жобаны жүзеге асыру жоспарланған. Соның арқасында 17,8 мың жұмыс орны ашылмақ.
Былтыр 157 мың тұрғын үй салынған. Биыл 172 мың тұрғын үй салу көзделіп отыр.
Сондай-ақ жалға берілетін 22 мың тұрғын үйдің құрылысына мемлекеттен 300 миллиард теңгеден астам қаржы бөлінген.
«Отбасы банкі» арқылы қаржыландыру көлемі 300 млрд теңгені құрайтын бағдарлама іске қосылады.
Бұл ел азаматтарына 12 мың ипотекалық займ беруге септігін тигізеді.
Жер қойнауын пайдалану құқығын беруге қатысты аукциондарды электронды форматта өткізу үшін E-Qazynakz цифрлық платформасы іске қосылған.
Бұл бастама процестің ашықтығы мен қолжетімділігін едәуір арттырды.
Қазіргі уақытта су басқан өңірлерде жаңа тұрғын үй салу үшін жобалық-сметалық құжаттаманың құнын бекіту жұмыстары аяқталып келеді.
Қасым-Жомарт Тоқаев апаттан қираған тұрғын үйлерді тез арада қалпына келтіруді тапсырды.
Еске сала кетсек, өткен жылдың қыркүйек айында Мемлекет басшысының жарлығымен Қанат Шарлапаев Қазақстан Республикасының Өнеркәсіп және құрылыс министрі лауазымына тағайындалған болатын. Ол бұған дейін «Бәйтерек» ұлттық басқарушы холдингінің Басқарма төрағасы қызметін атқарған. Еске сала кетейік, Индустрия және инфрақұрылымдық даму министрлігі екіге бөлініп, қайта құрылымдау жүргізілді.
