Жетісай ауданының білім бөліміне қарасты Абай атындағы №4 мектеп-гимназиясында “Цифрлы Қазақстан” бағдарламасы аясында Аблазимова Бибі-жамал Әбдімәлікқызы атындағы робототехника кабинеті ашылды. Халық арасында «Жамал апа» аталып кеткен апамыздың атындағы кабинеттің ашылуына перзенті Бахаридин Аблазимов, Жетісай ауданының бұрыңғы әкімі, зейнеткер Бейсенбаев Жамантай, журналист Жаппар Ғаппар, Жетісай ауданының білім бөлімінің басшысы Ғазиза Әлібекқызы және ардагер аналар Жетісай ауданының құрметті азаматтары қатысты.
Жетімдік пен жесірліктің зарын өзі де татқан Жамал апа өмірінің соңына дейін мұқтаждарға көмек қолын созып өтті. Көптеген қайырымдылық шаралардың басынан табылып, әрдайым өзінің жомарттығын, қайырымдылығы мен қамқорлығын көрсетіп жүрді.
Жамал апа Арыс қаласындағы жарылыстан, Қызылағаш пен Мақтааралдағы су тасқынынан, Жамбыл облысындағы табиғи апаттан зардап шеккен тұрғындарға алғашқы уақытта әлеуметтік көмегін арқалап барып, отандастарының жанынан табылды. Қатты зардап шеккендерге баспана салып беруге атсалысып, қаржылай көмегін үлестіріп қайтатын.
Қажылыққа баруды армандап жүрген сексеннен астам отандасымыздың қасиетті мекенге зиярат етіп келуіне көмектесті. Еліміздің түкпір-түкпіріндегі көпбалалы жалғызбасты аналар мен әлеуметтік аз қамтылған 67 отбасыға баспана кілтін табыстады.
Шалғайдағы алты елді мекенге табиғи газ құбыры тартылуын қаржыландырып, сол ауылдарда ондаған көшенің салынып, абаттануына қамқорлық еткен.
Ораза айт мерекесімен тұспа тұс келген шараны ұйымдастыруға Абай атындағы №4 мектеп-гимназия директоры Сәуірбаева Гүлмира және мектеп ұжымы белсенді атсалысты. Аблазимова Бибі-жамал Әбдімәлікқызы атындағы кабинетінің ашылу салтанатынан кейін Жамал апа туралы естеліктер, бейнероликтер көрсетіліп, есімі дәріптелді.
