Түркістан қалалық полиция басқармасының басшысы, полиция подполковнигі Бауыржан Жанаевтың қатысуымен саптық жиын өтті. Ондағы мақсат – жеке құрамның дайындығы мен даярлығын тексеріп, алдағы аптаның жұмыс жоспарын түсіндіру болатын. Аталған жиынға полиция басқармасының тергеу бөлімінің, патрульдік полиция ротасының және жеке құрам қызметкерлері түгел қатысты.
Жоспарсыз жұмыс болмайды. Осыны ескерткен басқарма басшысы қызметкерлерді қашанда қырағы әрі жауапты болуды, сондай-ақ, сыбайлас жемқорлыққа жол бермеуге, оның алдын алуға шақырды. Сонымен қатар, қылмыстың алдын алу, онымен күресу, азаматтардың құқығын қорғау, қоғамдық орындардағы тәртіпті сақтауда қырағы болуды ескертті.
Дәстүрлі саптық жиын барысында қызметкерлердің форма тазалығы, киім үлгісі, қызметтік куәліктері тексеріліп, сервистік полиция жұмысын жандандыру, жалпы тәртіпті сақтау ережелері түсіндіріліп, жұмыс жоспарлары тиянақталды.
Полиция қашанда қырағы әрі кез келген жағдайға тас түйін дайын болуы шарт. Бұл құқық қорғау саласында еңбек етіп жүрген барша қызметкердің бірінші міндеті.
«Ең бастысы – полиция қызметкерлері азаматтармен әдепті сөйлесуі, халықпен дұрыс қарым-қатынас орнатуы маңызды. Кез келген жағдайда халыққа көмек қолын созуға дайын болуы керек. Бұл үлкен жауапкершілікті талап етеді. Әсіресе, сервистік полиция жұмысын жандандырып, қызметтік форма тазалығын, киім кию үлгісін қатаң сақтап, тәртіпке бас иіп жүруі тиіс. Тәртіп бар жерде, ұқыптылық, жауапкершілік қатар жүрері сөзсіз», – деді Түркістан қалалық полиция басқармасының басшысы, полиция подполковнигі Бауыржан Жанаев.
