Мемлекет басшысы Қасым-Жомарт Кемелұлы Тоқаев өзінің Қазақстан халқына арнаған «Әділетті Қазақстанның экономикалық бағдары» атты Қазақстан халқына Жолдауында еліміздегі еңбек ресурстарының балансын есепке алудың тиімді әдістемесін әзірлеуді, сондай-ақ еңбек ресурстарының тапшылығы бар өңірлерде Үкіметке көші-қон үдерісін басқару үшін пәрменді шаралар қабылдауды тапсырған болатын.
Атап айтқанда, еңбек нарығын цифрландыру, жұмыспен қамту орталықтарының жұмысын реформалау, нәтижелі жұмыспен қамту және жаппай кәсіпкерлікті дамыту және тұрғындарды жұмыспен қамтуды арттыру үшін басқа да ауқымды іс-шаралар қарастырылған. Осы ретте облыс орталығы Түркістан қаласындағы тұрғындарды әлеуметтік қорғаудың түрлі жобалары жүзеге асып келеді. Биылғы жылғы жоспарда шаһарда 6899 жаңа жұмыс орнын құру қарастырылған. Жоспар жүзеге асырылғалы орталықта 6109 жаңа жұмыс орны ашылып үлгерген.Соңғы көрсеткіштерге сүйенсек, шаһардағы әлеуметтік белсенді тұрғындар саны – 78 171 жетсе, ал жұмыссыз тұрғындар саны – 3800 құраған.Сондай-ақ, мемлекеттік «Еңбек» бағдарламасы аясында жүйелі жоспарлар түзіліп, межелер қойылды.
«Қазір еңбек нарығында жастардың үлесі артып келеді. Үкіметке және әкімдерге 2030 жылға қарай 3 миллион 300 мың адамды жұмысқа тұрғызу туралы тапсырма берілді. Оның 2,2 миллионы жастар болуға тиіс. Жаңа жұмыс орындары уақытша емес, тұрақты болғаны жөн. Елімізде аймақтардың жұмыспен қамту карталары бекітілген. Соған сәйкес жыл сайын шамамен 950 мың адамға жұмыс тауып беру көзделген. Ол үшін бюджеттен 130 миллиард теңге бөлінді. Осы қаржының арқасында, яғни субсидия арқылы 150 мың адам жұмысқа орналасады. Оның бәрі – жастар және әлеуметтік тұрғыдан осал санаттағы азаматтар. Халықты, жастарды жұмыспен қамту – Үкімет үшін аса маңызды міндет. Әкімдер бұл жұмыстың нәтижелерін тұрақты түрде баяндап тұруы керек», – деді Мемлекет басшысы.
Жыл басынан бері аталған бағдарлама аясында жастар практикасымен 490 азамат жұмысқа жолданса, әлеуметтік жұмыс орындарына – 173 тұрғын, тұрақты жұмыс орындарына – 3551 адам орналасты.Ал, жыл басында қойылған межелердің бірқатары артығымен жүзеге асты.Атап айтқанда, 1231 азамат қоғамдық жұмыс орындарына (жоспар 1000), 102 адам алғашқы жұмыс орындарына ( жоспар-90), 175 тұрғын күміс жас жобасымен (жоспар-90) жұмысқа орналасты.
